Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 252 Hüküm no: 235 Orijinal metin no: [33a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mustafa’nın reşit olması sebebiyle vasisi Ali Ağa’daki hakkını aldığı Mahmiye-i İstanbul’da Sofular mahallesi sâkinelerinden olup sin ve cüssesinin bülûğa tahammülü olmağla bülûğunu rü’yet-i hayız ile mu‘terife ve zâtı ta‘rîf-i şer‘î ile mu‘arrefe olan Rukiye bt. Mustafa Ağa nâm hatun âkıle ve reşîde olduğu zeyl-i vesîkada mastûrü’l-esâmî Müslimîn ihbârlarıyla lede’ş-şer‘i’l-enver zâhir ve mütehakkık oldukdan sonra meclis-i şer‘-i hatîr-ı lâzımü’t-tevkīrde bâ‘is-i hâze’l-kitâb el-Hâc Ali Ağa b. Ömer b. Abdullah’ın kebîr oğlu ve tarafından ikrâr-ı âti’z-zikri tasdîka vekîl olduğu el-Hâc İsmail ve el-Hâc Salih b. Hüseyin nâm kimesneler şehâdetleriyle ber-nehc-i şer‘î sâbit olan Mehmed Emin Çelebi muvâcehesinde bi-tav‘ihâ ikrâr-ı tâm ve takrîr-i kelâm edip müvekkil-i mezbûr el-Hâc Ali Ağa hâl-i sıgārında vasî olmağla babam müteveffâ-yı mezbûr Mustafa Ağa’dan bi’l-ırsi’ş-şer‘î hisseme isâbet edip bi’l-vesâye makbûzu olan bin beş yüz otuz guruş hakkımı müvekkil-i mezbûr el-Hâc Ali Ağa bana tamâmen def‘ ü teslîm ettikde ben dahi ber-vech-i muharrer yedinden bi’t-tamâm ve’l-kemâl ahz u kabz ve tesellüm eyleyip meblağ-ı mezbûrda müvekkil-i mezbûrun yedinde zimmetinde bir akçe ve bir habbe hakkım bâkī kalmamağın husûs-ı mezkûra ve târîh-i kitâba gelince sâir hukūk-ı ma‘lûme ve mechûleye müte‘allıka kalîl ü kesîr, celîl ü hakīr âmme-i de‘âvî ve muhâsamât ve kâffe-i mutâlebât ve eymândan müvekkil-i mezbûr el-Hâc Ali Ağa’nın ve oğlu vekîl-i mezbûr Mehmed Emin Çelebi’nin ve zevcesi gāibe ani’l-meclis Zeyneb bt. el-Hâc Mehmed nâm hatunun zimmetlerini ibrâ-i âmm-ı katı‘u’n-nizâ‘la ibrâ ve ıskāt eyledim ba‘de’l-yevm mezbûrûn ile vechen mine’l-vücûh ve sebeben mine’l-esbâb kat‘â da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 8 S sene 1153. Şuhûdü’l-hâl: Fahrü’l-mevâli’l-izâm Kadrizâde Mustafa Efendi kādı-i Kudüs sâbıkā, fahrü’l-kuzât Çalkandızâde Mustafa Efendi, fahrü’l-kuzât Ali Efendi b. Hüseyin, Mehmed Efendi imâm-ı câmi‘-i Bali Paşa, Molla Mehmed Kırımî, Mehmed Emin b. el-Hâc Ali, el-Hâc Mustafa Odabaşı b. Hüseyin, el-Hâc Mustafa Odabaşı b. Hasan, Ahmed b. Receb, Abdullah b. Hasan, el-Hâc Salih b. Hüseyin, el-Hâc İsmail b. Hasan