Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 258 Hüküm no: 241 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İknados’un babasından aldığı evin satışını fesh ederek evi iade ettiği Fi’l-asl vilâyet-i Anadolu’da Eğin kazâsına tâbi‘ Çubuklu nâm karye ahâlîsinden olup mahmiye-i İstanbul’da ticâret vechi üzere mütemekkin İknados nâm zimmî meclis-i şer‘-i şerîf-i enverde babası hâmil-i hâze’r-rakīm Altun v. Bogos nâm zimmî muvâcehesinde tâyi‘an ikrâr ve takrîr-i kelâm edip târîh-i rakīmden sekiz sene mukaddem babam mesfûr Altun’dan yüz yetmiş guruşa mârrü’z-zikr Çubuklu karyesinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât mülk menzili iştirâ edip semeni henüz zimmetimde babam mezkûra edâsı lâzım deynim iken bi’t-terâzi beynimizde bey‘-i mezkûru ikāle ve fesh eyleyip menzil-i mezkûru babam mesfûr Altun’a temlîk ve mahallinde kabza tarafımdan taslît eylediğimde ol dahi ber-vech-i muharrer temlîk ve kabûl etmeğin menzil-i mezkûrda kat‘â benim alâka ve medhalim kalmayıp babam mesfûr Altun’un kemâ-kân mülk ve hakkıdır, mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 S sene 1153. Şuhûdü’l-hâl: Nakkaş Mustafa Çelebi b. Mehmed, Abdullah Çelebi b. Mehmed, es-Seyyid Mustafa b. es-Seyyid Hasan, el-Hâc Mustafa b. Mehmed, Kayıkcı Mustafa b. Mehmed, Arab el-Hâc Ahmed b. Ömer, Ahmed Çelebi b. Şa‘bân, Cebeci İbrahim b. Şa‘bân ve gayruhum