Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 258 Hüküm no: 242 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’den boşanan ve hamile olan Ayşe’ye nafaka takdiri Mahmiye-i İstanbul’da Çakır Ağa mahallesinde sâkine olup zâtı Ali Ağa b. Seydi, Hüseyin Beşe b. Mehmed nâm kimesneler ta‘rîfleriyle mu‘arrefe olan Âişe bt. Mehmed nâm hatun meclis-i şer‘-i hatîr-ı lâzımü’t-tevkīrde zevc-i mutallıkı bâ‘is-i hâze’l-kitâb Ahmed Beşe b. Abdi nâm kimesne mahzarında takrîr-i kelâm ve ta‘bîr ani’l-merâm edip mezbûrun firâşından hâsıl hamlim olmağla vaz‘-ı haml ile iddetim munkaziye oluncaya değin nafaka-i iddetim için mezbûr Ahmed Beşe üzerine kıbel-i şer‘den kadr-ı ma‘rûf nafaka-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi mezbûre Âişe’nin vaz‘-ı haml ile iddeti munkazıye oluncaya değin nafakası’çün zevc-i mutallıkı merkūm Ahmed Beşe üzerine târîh-i kitâbdan bi’t-terâzi yevmî sekiz akçe farz ve takdîr buyurup meblağ-ı mefrûz-ı mezbûru kendi nafakasına harc ü sarfa ve lede’l-iktizâ istidâneye ve inde’z-zafer mezbûr Ahmed Beşe üzerine rücû‘a mezbûre Âişe Hatun’a izin vermeğin mâ-vaka‘a bi’t-taleb ketb olundu. Fî 9 S sene 1153. Şuhûdü’l-hâl: Solak Mustafa Çelebi b. el-Hâc Mehmed, Kayıkcı Mustafa b. Mehmed, Derviş Hüseyin b. Musa, Halil b. İbrahim, Abdi b. Mustafa