Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 259 Hüküm no: 243 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın evdeki yarı hissesini oğlu Ahmed Çelebi’ye sattığı Mübâya‘a Mahmiye-i İstanbul’da Kadıasker Mehmed Efendi mahallesinde sâkine Fâtıma bt. Mustafa b. Abdullah nâm hatun tarafından bey‘-i âti’z-zikri ikrâra vekîl olduğu zât-ı mezbûreyi bi’l-ma‘rifeti’ş-şer‘iyye ârifân İbrahim Çelebi b. Mehmed ve Berber Ahmed Çelebi b. Abdullah nâm kimesneler şehâdetleriyle sâbit olan dâmâdı Ali Ağa b. Abdullah nâm kimesne, meclis-i şer‘-i şerîf-i enverde müvekkile-i mezbûrenin sadrî kebîr oğlu bâ‘is-i hâze’l-kitâb Ahmed Çelebi b. Şahin nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma Hatun yedimde mülk ve hakkım olup mahalle-i mezbûrede vâki‘ bir tarafdan Hüseyin Ağa mülkü ve bir tarafdan Kıtmîr Mehmed menzili ve bir tarafdan Âişe Hatun menzili ve bir tarafdan tarîk-i âm ile mahdûd fevkānî iki bâb oda ve tahta-pûş ve tahtında mahtab ve müşterek bi’r-i mâ ve bir mikdâr havluyu müştemil mülk menzilimin nısf-ı şâyi‘ini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile oğlum mezbûr Ahmed Çelebi’ye yüz on beş guruşa bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz on beş guruşu oğlum mezbûr Ahmed Çelebi yedinden tamâmen ahz u kabz eyledim ba‘de’l-yevm menzil-i mahdûd-ı mezkûrun nısf-ı şâyi‘inde benim alâka ve medhalim kalmayıp oğlum mezbûr Ahmed Çelebi’nin mülk-i müşterâsı olmuşdur keyfe mâ yeşâ ve yehtâr mutasarrıf olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 S sene 1153. Şuhûdü’l-hâl: el-Hâc Mustafa b. Mehmed, Ahmed Ağa b. Mehmed, Hüseyin Ağa b. Ahmed, Mustafa b. Mahmud, el-Hâc Ali b. Veli, el-Hâc Yusuf