Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 260 Hüküm no: 244 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amcası Mustafa’nın Lütfullah Çelebi’ye bıraktığı Mustafa adlı küçük çocuğa nafaka takdiri Mahrûse-i Galata’da Câmi‘-i kebîr mahallesi sükkânından bâ‘is-i hâze’l-kitâb es-Seyyid Lütfullah Çelebi b. es-Seyyid el-Hâc Hüseyin nâm kimesne meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip işbu Mustafa nâm sagīreyi gāib ani’l-meclis ammi Mustafa nâm kimesne li-ecli’t-terebbî ve’t-tebennî bana teslîm etmekle sagīr-i mezbûrun nafaka ve kisve ve sâir levâzım-ı zarûriyesi’çün men-lehü’l-hak ve’t-taleb üzerine kıbel-i şer‘-i enverden kadr-ı ma‘rûf akçe farz ve takdîr olunmak murâdımdır dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisvesi’çün târîh-i kitâbdan beher yevm altışar akçe farz ve takdîr edip meblağ-ı mefrûz-ı mezkûru sagīr-i mezbûr Mustafa’nın nafaka ve kisve ve sâir levâzım-ı zarûriyesi’çün harc ü sarfa ve lede’l-iktizâ istidâneye ve inde’z-zafer men-lehü’l-hak ve’t-taleb üzerine rücû‘a mezbûr es-Seyyid Lütfullah Çelebi’ye izin birle mâ-vaka‘a bi’t-taleb ketb olundu. Fî 9 S sene 1153. Şuhûdü’l-hâl: Ali Çelebi b. Mehmed, Halil Reis b. Osman, Molla Mehmed b. Mehmed Efendi, Solak Mustafa Çelebi, Molla Hüseyin b. el-Hâc Mehmed, Ahmed Efendi b. Mehmed, Mustafa Çelebi b. Mehmed el-müezzin, Mustafa Çelebi b. Mustafa, es-Seyyid el-Hâc Mustafa b. es-Seyyid Süleyman, Abdullah Çelebi b. Hasan