Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 260 Hüküm no: 245 Orijinal metin no: [34b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin Acem asıllı Zeyneb’i azat ettiği Itâk Mahmiye-i İstanbul’da Sinan Ağa mahallesinde sâkin es-Seyyid Mustafa Efendi b. Hasan nâm kimesne meclis-i şer‘-i hatîr-ı lâzımü’t-tevkīrde kendüye rıkkıyetini mu‘terife olan orta boylu, açık kaşlı, kara gözlü, Acemiyyetü’l-asl râfi‘atü hâzihi’l-vesîka Zeyneb bt. Hüseyin Kulu mahzarında ikrâr ve takrîr-i kelâm edip hâlâ silk-i mülkümde münselike olan mevsûfe-i mezbûre Zeyneb’i hasbeten lillâhi’l-meliki’l-hallâk taleben li-merzâti Rabbi’r-rezzâk cemî‘ mâlımdan tahrîr ü i‘tâk ve kayd-ı rıkkıyetden ıtlâk ve zümre-i harâir-i asliyâta idrâc ü ilhâk eyledim ba‘de’l-yevm mevsûfe-i mezbûre Zeyneb sâir harâir-i asliyye gibi hürre olup üzerinde olan velâ-i şer‘îden gayrı hakkım bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 S sene 1153. Şuhûdü’l-hâl: Mehmed Çavuş el-mübâşir, el-Hâc Mustafa b. el-Hâc Mehmed, Hüseyin Çelebi b. el-Hâc Mehmed, es-Seyyid Mustafa b. es-Seyyid Hasan, Mehmed b. İbrahim, Ahmed b. Süleyman