Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 261 Hüküm no: 246 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun ile Mehmed b. Halil’in evdeki hisselerini Safiye Hatun’a sattıkları Mübâya‘a-i hisse Mahmiye-i İstanbul’da Vefâ kurbünde Yahya Güzel mahallesinde sâkine Âişe bt. İsmail nâm hatun asâleten ve Şerife bt. es-Seyyid Abdülkerim b. Mustafa nâm hatun tarafından bey‘-i âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iyye ârifân Molla Mustafa b. Mehmed ve Salih Çelebi b. el-Hâc Mehmed şehâdetleriyle şer‘an sâbit olan el-Hâc Mehmed b. el-Hâc Halil nâm kimesne vekâleten meclis-i şer‘-i şerîf-i enverde bâ‘isetü hâzihi’l-vesîka Şerife Safiye bt. es-Seyyid Hasan nâm hatun mahzarında her biri bi’l-asâle ve bi’l-vekâle ikrâr ve takrîr-i kelâm edip medîne-i hazret-i Ebî Eyyûb Ensârî -aleyhi rahmetü’l-bârî- de Şah Sultan mahallesinde vâki‘ bir tarafdan Halil Çelebi mülkü ve bir tarafdan merhûm eş-Şeyh es-Seyyid Hüseyin Efendi mülkü ve bir tarafdan ba‘zan makābir-i Müslimîn ve ba‘zan cebel ve bir tarafdan tarîk-i âm ile mahdûd fevkānî üç bâb oda ve bir matbah ve bi’r-i mâ ve kenîf ve bir mikdâr bahçeyi müştemil mülk menzilin yüz kırk dört sehm i‘tibâriyle irsen ve şirâen yedlerimizde mülk ve haklarımız olan altmış yedi sehm hisse-i şâyi‘alarımızı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Şerife Safiye Hatun’a yüz yirmi yedi guruşa bi’l-asâle ve bi’l-vekâle bey‘ ve temlîk eylediğimizde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz yirmi yedi guruşu mezbûre Şerife Safiye Hatun yedinden bi’l-asâle ve bi’l-vekâle bi-kadri’l-hısâs tamâmen ahz u kabz eyledik ba‘de’l-yevm menzil-i mahdûd-ı mezkûrda olan altmış yedi sehm hisse-i şâyi‘alarımızda bizim kat‘an alâka ve medhalimiz kalmayıp mezbûre Şerife Safiye Hatun’un mülk-i müşterâsı olmuşdur keyfe mâ teşâ ve tehtâr mutasarrıfe olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 S sene 1153. Şuhûdü’l-hâl: Molla Mustafa b. Mehmed, Salih Çelebi b. el-Hâc Mehmed, el-Hâc Mustafa b. el-Hâc Mehmed, es-Seyyid Mustafa b. es-Seyyid Hasan