Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 261 Hüküm no: 247 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Efendi’nin varislerinden Mustafa’nın ev ve arsa hissesini kız kardeşi Fatıma’ya sattığı Keşf Husûs-ı âti’z-zikrin mahallinde ketb ü tahrîri için sâdır olan fermân-ı âlîlerine imtisâlen savb-ı şer‘-i enverden irsâl olunan Mevlânâ Hıfzı el-Hâc Mehmed Efendi mahmiye-i İstanbul’da Avratpazarı kurbünde Hobyar mahallesinde sâkin iken bundan akdem vefât eden Yusuf Efendi b. Mustafa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde müteveffâ-yı mezbûrun sulbî kebîr oğlu Mustafa nâm kimesne tarafından husûs-ı âti’z-zikre vekîl olduğu kuzâtdan Mehmed Efendi b. Süleyman ve Çamaşırcı Mehmed Ağa şehâdetleriyle sâbit ve sübût-ı vekâletine hükm-i şer‘î lâhık olan el-Hâc Ali b. Mehmed nâm kimesne meclis-i ma‘kūd-ı mezkûrda müvekkil-i mezbûrun li-ebeveyn er karındaşı olup zâtı mezbûrân Mehmed Efendi ve Mehmed Ağa ta‘rîfleriyle mu‘arrefe olan bâ‘isetü hâzihi’l-vesîka Fâtıma nâm hatun mahzarında bi’l-vekâle ikrâr ve takrîr-i kelâm edip ashâb-ı hayrâtdan merhûm Haydar Ağa Evkāfı’ndan bi’l-icâretyn müteveffâ-yı mezbûrun ile’l-vefât taht-ı tasarrufunda olup ba‘de’l-vefât oğlu müvekkilim mezbûr Mustafa ile kızı mezbûre Fâtıma Hatun’a ve hâzıra bi’l-meclis kebîre kızı Rukiye ve sagīre kızları Hanife ve Ümmühan’dan her birine intikāl-i âdî ile intikāl eden mahalle-i mezbûrede vâki‘ ma‘lûmü’l-hudûd ve’l-müştemilât birbirine muttasıl iki bâb menzil ve iki bâb menzil arsalarından beş sehm i‘tibâriyle müvekkilim mezbûr Mustafa bir sehm hissesini doksan beş guruş bedel mukābelesinde bâ-ma‘rifet-i mütevellî kız karındaşı mezbûre Fâtıma Hatun’a ferâğ ve tefvîz edip ol dahi ber-vech-i muharrer tefevvüz ve kabûl eylediğinden sonra mezbûre Fâtıma Hatun dahi menzil-i mezkûrun ecr-i misline ve istîfâsına müte‘allıka âmme-i da‘vâdan her biri âharın zimmetini ibrâ-i âmm-ı râfi‘ü’l-hısâm ile ibrâ ve ıskāt eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Ebubekir b. Mehmed ve Muhzır Mustafa b. Mehmed ile meclis-i şer‘a gelip âlâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: Osman Ağa b. Ali, Ali Çelebi b. Mustafa, Hüseyin Efendi b. Mehmed el-müezzin, el-Hâc Mustafa b. Mehmed, Hüseyin b. Mustafa