Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 262 Hüküm no: 248 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in boşandığı kocasıyla olan davasında sulh olduğu Sulh Mahmiye-i İstanbul’da Çakır Ağa mahllesinde sâkine olup zâtı Ali Ağa b. Seydi ve Hüseyin Beşe b. Mehmed nâm kimesneler ta‘rîfleriyle mu‘arrefe olan Âişe bt. Mehmed nâm hatun meclis-i şer‘-i hatîr-ı lâzımü’t-tevkīrde zevc-i mutallıkı bâ‘is-i hâze’l-kitâb Ahmed Ağa b. Abdi nâm kimesne mahzarında ikrâr ve takrîr-i kelâm edip mezbûr Ahmed Ağa zimmetinde mütekarrer ve ma‘kūdün-aleyh elli guruş mehr-i müeccelim ve cihet-i karz-ı şer‘îden iki yüz yirmi guruş hakkımı taleb ve da‘vâya tasaddî edip beynimizde münâza‘ât-ı kesîre ve muhâsâmât-ı şedîde ve ekîde cereyân etmiş idi, el-hâletü hâzihi beynimize muslihûn tavassut edip da‘vâ-yı mezkûremden beni merkūm Ahmed Ağa ile yüz kırk guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezkûru kabûl ve bedel-i sulh olan meblağ-ı mezbûr yüz kırk guruşu merkūm Ahmed Ağa yedinden tamâmen ahz u kabz edip husûs-ı mezkûra ve sâire müte‘allıka târîh-i kitâba gelince âmme-i de‘âvî ve kâffe-i mutâlebât ve eymân [ve] muhâsamâtdan mezbûr Ahmed Ağa’nın zimmetini ibrâ ve ıskāt eylediğimde ol dahi kezâlik bedel-i sulh-ı mezkûra ve sâir târîh-i kitâba gelince âmme-i da‘vâdan benim zimmetimi ibrâ ve ıskāt edip birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 S sene 1153. Şuhûdü’l-hâl: Çukadâr Ömer b. (°), Derviş Hüseyin b. Musa, İbrahim b. Ahmed cebeci, Abdi b. Mustafa, Halil Beşe b. İbrahim mumcu, el-Hâc Halil b. Mehmed, Mustafa b. Hüseyin, Mustafa Usta b. Hüseyin, Halil b. Süleyman, Seydi Beşe b. Mehmed, Ali Ağa b. Seydi, Kayıkcı Mustafa b. Mehmed, Solak Mustafa Çelebi b. el-Hâc Mehmed, Mahmud Odabaşı C. 63?