Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 264 Hüküm no: 250 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin Edirne Cizyedarı İbrahim Ağa’daki alacağı konusunda açtığı davaya sulh bedeli karşılığı son verildiği Sulh Fi’l-asl mahrûse-i Edirne’de Sultan Bayezid kurbünde Firuz Ağa mahallesi ahâlîsinden olup mahmiye-i İstanbul’da Murad Paşa mahallesinde müsâfiren sâkin Mustafa Efendi b. Abdullah nâm kimesne meclis-i şer‘-i enverde sâbıkā Edirne cizyedârı olan sâhib-i hâzihi’l-vesîka fahrü’l-emâsil ve’l-akrân es-Seyyid İbrahim Ağa b. es-Seyyid Ahmed nâm kimesne mahzarında ikrâr-ı tâm ve takrîr-i kelâm edip bundan akdem mezbûr es-Seyyid İbrahim Ağa mahrûse-i mezbûrede cizyedâr iken ol havâlîde uhdemde olup bana tefvîz eylediği Yanbolu ve Üsküdar cizyeleri evrâkından a‘lâ ve evsat ve ednâ i‘tibâriyle dört bin dört yüz cizye evrâkını bana def‘ ü teslîm ben dahi ba‘de’t-tevzî‘ ağa-i müşârün-ileyh [ile] hesâb gördüğümüzde teslîmâtımdan mâ‘adâ zimmetimde bâkī kalan bin guruş deynim mukābelesinde ben ve zâtı ta‘rîf-i şer‘î ile mu‘arrefe olan ve hâzıra bi’l-meclis zevcem Fâtıma bt. Yahya nâm hatun mâlımızdan kıymeti beynimizde ma‘lûm bir sîm kemer raht ve bir sîm devât ve bir pandül sâ‘at ve bir bıçak ve üç kutnî mak‘ad ve Yanya-kârî bir sîm gülâbdân ve buhûrdân ve bir kırmızı sof kerrâke ve bir samur paçası kürk ve bir sâye yağmurluk ve bir yeşim taşlı yakut altın kuşak ve on iki miskāl bir çift bilezik ve üç yasdık ve bir kutnî kebîr perde ve iki dîbâ kaftan anteri ve bir dîbâ kaplı kakum kürk ve bir dîbâ kürk kabı ve bir Mardin boğçası ve bir çift zümrüd küpe ve bir tek la‘l küpe ve bir elmas yüzük ve bir incili kuşağı irhân ve teslîm mezbûr es-Seyyid İbrahim Ağa dahi irtihân ve tesellüm ve kabûl eyledikden sonra deyn-i mezbûr beş yüz yirmi buçuk guruşunu edâ edip zimmetimde ancak sekiz yüz yetmiş dokuz buçuk guruş deynim bâkī kalmış iken mezbûr es-Seyyid İbrahim Ağa rihân-ı mezbûreden işbu defter mantûkunca bin yüz on guruş kıymetli eşyâ-i ma‘lûmemizi iznimiz yoğ iken fuzûlî âhara bey‘ ile istihlâk etmekle rihân-ı müstehleke kıymetinden sekiz yüz yetmiş dokuz buçuk guruş deyn-i mezkûrdan bâkī kalan ol mikdârına takas olundukdan sonra mâ‘adâsı olan iki yüz yetmiş buçuk guruşu bi-tarîkı’z-zamân mezbûr es-Seyyid İbrahim Ağa’dan taleb ederiz deyü da‘vâ eylediklerinde beynlerinde münâza‘ât-ı kesîre ve muhâsamât-ı şedîde cereyânından sonra da‘vâ-yı mezkûrelerinden mezbûr Mustafa Efendi ve zevcesi merkūme Fâtıma’yı mezbûr es-Seyyid İbrahim Ağa ile yüz guruş üzerine sulh eylediklerinde onlar dahi ber-vech-i muharrer sulh-ı mezkûru kabûl ve bedel-i sulh-ı mezkûr yüz guruşu mezbûr es-Seyyid İbrahim Ağa’nın yedinden bi’t-tamâm ahz u kabz edip mezbûr Mustafa Efendi ve zevcesi merkūme Fâtıma ve kayınvâlidesi olup zâtı kezâlik ta‘rîf-i şer‘î ile mu‘arrefe olan hâzıra bi’l-meclis Hadîce bt. Ahmed nâm hatun husûs-ı mezbûra ve işbu târîh-i vesîka gelince cemî‘ ahz u i‘tâ ve mu‘âmelât-ı şettâdan hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan mezbûr es-Seyyid İbrahim Ağa’nın zimmetini ibrâ-i âmm-ı katı‘u’n-nizâ‘la ibrâ ve ıskāt eylediklerinde ol dahi kabûl ve kezâlik âmme-i da‘vâdan mezbûrûnun zimmetlerini ibrâ ve ıskāt etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: İsmail tâbi‘-i Hüseyin Ağa, Mehmed tâbi‘-i Hüseyin Ağa, Osman tâbi‘-i Hasan Ağa, Muhzır Süleyman Çelebi, fahrü’l-akrân Kethüdâ Ahmed Ağa, Salih Çelebi, Halil Efendi tâbi‘-i kîsedâr-ı rûznâmçe, fahrü’l-emsâl İbrahim Hanzâde dâmâdı Hasan Ağa, fahrü’l-akrân İhtisâb Ağası Hüseyin Ağa, umdetü’l-mahâdimü’l-kirâm es-Seyyid Mehmed Tahir Efendi b. kâtib-i arz el-müvellâ el-merhûm Mahmud Efendi, fahrü’l-müderrisîni’l-kirâm Keşşâf Mustafa el-Hâc Mehmed Efendi, Küçük Osman tâbi‘-i Hüseyin Ağa, İbrahim Çavuş el-mübâşir