Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 265 Hüküm no: 251 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ahmed’in tasarrufundaki vakıf arsasını Ali Çelebi’ye ferağ ettiği Keşf Husûs-ı âti’z-zikrin mahallinde ketb ü tahrîri için bâ-fermân-ı âlî savb-ı şer‘[den] bi’l-iltimâs irsâl olunan keşif nâibi Mevlânâ Hıfzı el-Hâc Mehmed Efendi hâssa mimârlarından Mustafa Halîfe b. Ahmed ve Halil Halîfe b. İbrahim ile mahmiye-i İstanbul’da Kapan-ı dakīk dâhilinde Üskübî mahallesinde vâki‘ zikri âtî arsa üzerine varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr ettikde Ali b. Ahmed nâm kimesne meclis-i ma‘kūd-ı mezkûrede sâhib-i hâze’l-kitâb es-Seyyid Ali Çelebi b. (°) nâm kimesne mahzarında ikrâr-ı tâm ve takrîr-i kelâm edip ashâb-ı hayrâtdan merhûm Defterdâr Kara Süleyman Efendi Evkāfı’ndan olup mahalle-i mezbûrede vâki‘ bir tarafdan yine vakf-ı mezbûrdan el-Hâc Mehmed tasarrufunda olan menzil ve iki tarafdan Öküz Mehmed Paşa Evkāfı’ndan mezbûr es-Seyyid Ali Çelebi ve kız karındaşı Zeliha nâm hatun tasarruflarında olan menzil ve bir tarafdan ba‘zan su hazînesi ve ba‘zan tarîk-i âm ile mahdûd arsa-i hâliye mütevellî-yi vakf Hasan Ağa b. Abdullah ve Öküz Mehmed Paşa Vakfı mütevellîsi kāimmakāmı Keresteci Ali Ağa hazır oldukları halde mimârân-ı mezbûrân mesâhaları üzere mezbûr Öküz Mehmed Paşa Vakfı olan mezbûr es-Seyyid Ali Çelebi tarafından tûlen yedi zirâ‘ ve arzen altı zirâ‘ bi-hesâb-ı terbî‘î kırk iki zirâ‘ ve çitlenbik ağacı tarafından tûlen altı zirâ‘ ve arzen iki buçuk zirâ‘ bi- hesâb-ı terbî‘î on beş zirâ‘ ki cem‘an elli yedi zirâ‘ arsa-i hâliyeyi bundan akdem ber-mûceb-i temessük otuz beş guruş icâre-i mu‘accele ve beher şehr beş akçe icâre-i müeccele ile bi’t-tevliye bana îcâr ben dahi ber-minvâl-i muharrer istîcâr ve kabûl etmiş idim, hâlâ zikr olunan elli yedi zirâ‘ arsa-i hâliyemi mezbûr es-Seyyid Ali Çelebi’ye otuz yedi guruş bedel mukābelesinde bâ-ma‘rifet-i mütevellî ferâğ ve tefvîz eylediğimde ol dahi minvâl-i meşrûh üzere tefevvüz ve kabûl eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an mürsel Çukadâr Musa b. Mehmed ve Muhzır Mustafa b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Saferi’l-hayr sene 1153. Şuhûdü’l-hâl: Müezzin Süleyman Halîfe b. Ahmed, es-Seyyid Ebubekir Çelebi b. (°) kayyım, Mustafa Ağa b. Ahmed, el-Hâc Mahmud Ağa, Hammâmî el-Hâc Mustafa, es-Seyyid Mehmed Emin Efendi