Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 266 Hüküm no: 252 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksi’nin borcunu vekil Kostandi’den tahsil ettiği İsbât-ı vekâlet Vilâyet-i Rumeli’de Yenişehir-i Fener nevâhîsinden Fener nâhiyesine tâbi‘ Zarmako nâm karyede mütemekkine Kiresto bt. Panayot v. Yani nâm Nasrâniye tarafından ber-vech-i âtî vekâlet iddi‘â eden hâmil-i hâze’r-rakīm Aleksi v. Panayot nâm zimmî meclis-i şer‘-i hatîr-ı lâzımü’t-tevkīrde Kostandi v. Polizar nâm zimmî muvâcehesinde üzerine da‘vâ ve takrîr-i kelâm edip mesfûre Kiresto bt. Panayot v. Yani Nasrâniye mersûm Kostandi zimmî zimmetinde cihet-i karzdan olan on guruş hakkını ve zimem-i nâsda olan hukūkunu ve sadrî oğlu olup bundan akdem hâlik olan Apostol v. Korteş v. Dimolaki hayâtında mesfûrenin taht-ı tasarrufunda olan mahmiye-i İstanbul’da Yedikule hâricinde vâki‘ Çarşıbaşı mumhânesi demekle ma‘rûf mumhânesinde tarafından müste’ciri olmağla mârrü’z-zikr mumhâneyi derûnunda mevcûd olan sermâye ve âlât-ı lâzımesini hâlik-i mesfûrun vasîsi gāib ani’l-meclis İstoryo zimmîden taleb ve da‘vâ ve ahz u kabza ve mumhâne-i mezkûreyi tarafından âhara îcâra, icâresini ahz u kabza ve lede’l-iktizâ sulh ve ibrâya ve kendüye îsâl ve teslîme ve bunlar mutavakkıf olduğu umûrun küllîsine tarafından beni kabûlüme mevkūfe vekâlet-i sahîha ile kefîl ve nâib-i menâb nasb u ta‘yîn ettikde ben dahi ber-vech-i muharrer vekâlet-i merkūmeyi kabûl ve merâsimini edâya ta‘ahhüd ve iltizâm eylediğim ecilden meblağ-ı mezbûr on guruşu mersûm İsteryo zimmîden taleb eylediğimde teslîmden imtinâ‘ eder suâl olunup bana teslîme tenbîh olunması bi’l-vekâle murâdımdır dedikde gıbbe’s-suâl [36a] mersûm İsteryo zimmî cevâbında cihet-i merkūmeden müvekkile-i mesfûreye zimmetinde edâsı lâzım on guruş deyni olduğunu ikrâr lâkin müdde‘î-i mesfûrun vekâletini inkâr edicek müdde‘î-i mesfûr Aleksi zimmetinde mesfûrun vekâletini inkâr edicek müdde‘î-i mesfûr Aleksi zimmîden ber-vech-i meşrûh vekâletine beyyine taleb olundukda udûl-ı millet-i Nasârâdan ve karye-i mezbûre ahâlîsinden olup mahmiye-i merkūmede ticâret vechi üzere mütemekkinler Yorgi v. Kosta ve Evker v. Hıristo nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ vilâyet-i Rumeli’de Yenişehir-i Fener nevâhîsinden Fener nâhiyesine tâbi‘ Zarmako nâm karyede mütemekkine Kiresto bt. Panayot v. Yani nâm Nasrâniye işbu Kostandi zimmî zimmetinde cihet-i karzdan olan on guruş hakkını ve zimem-i nâsda olan hukūkunu ve sadrî oğlu olup bundan akdem hâlik olan Apostol v. Korteş v. Dimolaki hayâtında mesfûrenin taht-ı tasarrufunda olan mahmiye-i İstanbul’da Yedikule hâricinde vâki‘ Çarşı mumhânesi demekle ma‘rûf mumhânesinde tarafından müste’ciri olmağla mârrü’z-zikr mumhâneyi ve derûnunda mevcûd olan sermâye ve âlât-ı lâzımesini hâlik-i mesfûrun vasîsi gāib ani’l-meclis İsteryo zimmîden taleb ve da‘vâ ve ahz u kabza ve mumhâne-i mezkûreyi tarafından âhara îcâra ve icâresi ahz u kabza ve lede’l-iktizâ sulh u ibrâya kendüye îsâl ve teslîme ve bunlar mutavakkıf olduğu umûrun küllîsine müdde‘î-i mesfûr Aleksi v. Panayot’u tarafından kabûlüne mevkūfe vekâlet-i sahîha ile bizim huzûrumuzda vekîl ve nâib-i menâb nasb u ta‘yîn edip bizi işhâd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde şâhidân-ı mesfûrân sırran ve alenen tezkiye olundukda makbûlü’ş-şehâde olmağın mûcebince ba‘de’l-hükm ve’t-tenbîh vekîl-i mesfûr Aleksi zimmî meclis-i şer‘de mersûm Kostandi zimmî muvâcehesinde bi’l-vekâle ikrâr ve takrîr-i kelâm edip ânifen edâsına tenbîh olunan meblağ-ı mezbûr on guruşu mersûm Kostandi bana def‘ ü teslîm ben dahi vekâlet-i mahkiyem hasebiyle yedinden tamâmen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: Hasan Beşe b. Ali, el-Hâc Mustafa b. el-Hâc Mehmed, es-Seyyid Mustafa Çelebi b. es-Seyyid Hasan, Hüseyin Çelebi b. el-Hâc Mehmed, fahrü’l-müderrisîni’l-kirâm es-Seyyid Mehmed Ma‘sum Efendi La‘lîzâde, Mehmed Ağa b. Mehmed, Hüseyin Ağa b. Ali kethüdâ-yı mumcuyân, Bektaş b. Ali yiğitbaşı