Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 267 Hüküm no: 253 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ömer’in istiğlâl yoluyla borç aldığı İstiğlâl Mahmiye-i Kostantıniyye mahallâtından Mimârsinan mahallesinde sâkin el-Hâc Mehmed b. Ömer b. Mustafa nâm kimesne meclis-i şer‘-i şerîf-i âlî-kadirde hâmil-i hâze’l-kitâb İmâm el-Hâc Mustafa Efendi b. el-Hâc Ali nâm kimesne mahzarında ikrâr ve takrîr-i kelâm edip mahalle-i merkūmede vâki‘ bir tarafdan Hadîce Hatun mülkü ve bir tarafdan Safiye Hatun mülkü ve bir tarafdan el-Hâc Abdurrahman menzili ve bir tarafdan tarîk-i âm ile mahdûd üç bâb fevkānî oda ve bir sofa ve tahtında ahur ve havlu ve bi’r-i mâ ve müştemilât-ı sâire-i ma‘lûmeyi hâvî mülk menzil gāibetü ani’l-meclis Ümmügülsüm bt. Mustafa nâm hatun ile ber-vech-i iştirâki’s-seviyy yedimizde mülk-i mevrûsumuz olmağın ben menzil-i mahdûd-ı mezkûrda olan nısf hisse-i şâyi‘amı tarafeynden îcâb ve kabûlü hâvî alâ-tarîkı’l-istiğlâl imâm-ı mezbûr el-Hâc Mustafa Efendi’ye dört yüz guruşa bey‘ ve teslîm ol dahi ber-vech-i mübeyyen iştirâ ve tesellüm ve kabûl edip semen-i merkūm dört yüz guruşu imâm-ı mezbûrun yedinden ahz u kabz eylediğimden sonra imâm-ı mezbûr el-Hâc Mustafa Efendi menzil-i mahdûd-ı mezkûru gıbbe’t-tahliyeti’ş-şer‘iyye ve’t-tekābüz beher şehr beşer guruş ücret ile târîh-i kitâbdan bir sene tamâmına değin bana îcâr ve teslîm ettikde ben dahi ber-vech-i muharrer istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mâ hüve’l-vâki‘ bi’l-ibtigā sebt ve terkîm olundu. Fî 13 S sene 1153. Şuhûdü’l-hâl: Hâfız Ahmed b. Mehmed, Eyyûbî Mehmed b. Mustafa, Halil b. İbrahim, el-Hâc Mustafa Arabzâde, Mehmed Çelebi b. İbrahim …?, Abdurrahim Efendi el-imâm, Mustafa Efendi b. Ahmed, Mustafa b. Abdullah, Osman Odabaşı b. Mehmed, el-Hâc Hüseyin Ağa b. Halil