Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 268 Hüküm no: 254 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed’in eşi Salih’den muhâlaa yoluyla boşandığı Muhâla‘a Mahmiye-i Kostantıniyye mahallâtından Ördek Kasab mahallesinde sâkine Âişe bt. Ahmed nâm hatun zâtı Mehmed Çelebi b. Ahmed ve Solak Mustafa b. el-Hâc Mehmed nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf-i Muhammedî’de zevc-i dâhili hâmil-i hâze’l-vesîka Salih Çelebi b. Mehmed nâm kimesne muvâcehesinde ikrâr-ı tâm ve takrîr-i kelâm edip zevcim mezbûr Salih Çelebi ile hüsn-i mu‘âşeretimiz olmamağla zimmetinde mütekarrer ve ma‘kūdün-aleyh altı bin akçe mehr-i müeccelimden fâriğa olup mezbûrun firâşından hâsıl hamlim olmağla vaz‘-ı haml edinceye değin nafaka-i iddetim üzerlerine ve me’ûnet-i süknâm dahi kendi üzerime olmak üzere zevcim mezbûr Salih Çelebi ile muhâla‘a-i sahîha-i şer‘iyye ile hul‘ olduğumdan ol dahi ber-vech-i muharrer hul‘-i mezkûru ba‘de’l-kabûl hukūk-ı zevciyete ve sâir hukūk-ı ma‘lûme ve mechûleye müte‘allıka kalîl ü kesîr ve celîl ü hakīr âmme-i de‘âvî ve muhâsamât ve kâffe-i eymân ve mutâlebâtdan her birimiz âharın zimmetini ibrâ-i âmm-ı râfi‘ü’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 14 S sene 1153. Şuhûdü’l-hâl: Mehmed Efendi el-imâm, Za‘îm Halil Ağa, Hüseyin b. el-Hâc Mehmed, Ahmed Çelebi b. Şa‘bân, Ahmed Çelebi b. Hasan, İbrahim Efendi el-mukayyid b. Mustafa Ağa, Mehmed b. Ahmed, Mehmed Ağa b. İsmail, diğer Mehmed Ağa b. İsmail, Mustafa b. el-Hâc Mehmed, el-Hâc Ahmed b. Mustafa, Molla Hüseyin b. Abdullah