Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 269 Hüküm no: 255 Orijinal metin no: [36a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin kaşıkçılar esnafının kethüdalığına tayin edildiği Cera’l-emru hasbemâ hurrire fîhi nemakahû el-fakīr ileyhi azze şânühû Mehmed b. Mehmed el-müvellâ hilâfeten bi-Dârü’s-saltanati’l-Kostantıniyye el-mahmiye Kaşıkcı esnafının kethüdâlığı Dârü’s-saltanati’l-aliyye Kostantıniyyetü’l-mahmiyede vâki‘ kaşıkcı esnafının kethüdâsı es-Seyyid Mustafa Çelebi b. Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de sâhib-i hâzihi’l-vesîka es-Seyyid Ahmed Çelebi b. Hasan nâm kimesne mahzarında ikrâr-ı tâm ve takrîr-i kelâm [edip] mezbûr es-Seyyid Ahmed Çelebi bundan akdem esnaf-ı mezbûrun umûrunu rü’yet için kıbel-i şer‘den mansûb kethüdâları iken esnaf-ı mezbûr iltimâsıyla ba‘de’l-azl yerine beni kethüdâ nasb u ta‘yîn etmişler idi, el-hâletü hâzihî esnaf-ı mezbûrîne mezbûr es-Seyyid Ahmed Çelebi’nin üzerlerine kethüdâ olması taleb ve iltimâs etmeleriyle ben dahi kendi hüsn-i rızâ ve ihtiyârımla kethüdâlığı ferâgat ve kasr-ı yed eylediğimde ol dahi ba‘de’l-kabûl ve hıdemât-ı lâzımesini ikâmete ta‘ahhüd ve iltizâm etmekle cânib-i şer‘-i hatîrden dahi kethüdâ nasb u ta‘yîn olunup yedine vesîka verilmek matlûbumdur dedikde mezbûr es-Seyyid Ahmed Çelebi ve esnaf-ı mezbûr erbâbı merkūm es-Seyyid Mustafa Çelebi’yi cemî‘ takrîrini tasdîk eylediklerinden sonra hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri esnaf-ı mezbûr erbâbı üzerlerine merkūm es-Seyyid Mustafa Çelebi kasr-ı yedinden mezbûr es-Seyyid Ahmed Çelebi’yi kethüdâ nasb u ta‘yîn buyurup işbu vesîka-i enîka [36b] bi’t-taleb ketb olunup yedine def‘ u i‘tâ olundu. Fi’l-yevmi’s-sânî min-Saferi’l-hayr li-sene selâse ve hamsîn ve mi’e ve elf min-hicreti men-lehü’l-izzü ve’ş-şeref. Şuhûdü’l-hâl: Hüseyin Çelebi b. el-Hâc Mehmed, Mustafa b. el-Hâc Mehmed, Ahmed Çelebi b. Şa‘bân, Eyyûbî Mehmed b. Mustafa, İvaz Çelebi b. Abdullah, Mehmed Ağa b. Mehmed kethüdâ-yı muhzırân, Salih Çelebi b. Süleyman, Mehmed Çelebi b. Ahmed, el-Hâc Mustafa b. el-Hâc Mehmed, es-Seyyid Mustafa Çelebi Ruhalı