Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 269 Hüküm no: 256 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa’nın Afife Hatun’dan aldığı evi aralarında anlaşarak almaktan vazgeçtiği (ikale) Mübâya‘a Derûn-ı hüccetde mezkûrü’l-ism es-Seyyid Salih Ağa b. Ali meclis-i şer‘-i hatîr-ı lâzımü’t-tevkīrde merkūme Afife bt. Osman Efendi mahzarında ikrâr ve takrîr-i kelâm edip işbu hüccet-i şer‘iyyede tasrîh ve beyân olunduğu vech üzere mahrûse-i Edirne’de Karaca Bevvâb mahallesinde vâki‘ etrâf-ı selâseden Fâtıma Hatun mülkü ve ba‘zan zikri âtî menzil-i dâhiliyesinin hâriciyesi olup ve ba‘zan tarîk-i âm ile mahdûd müştemilât-ı mezkûreyi muhtevî dâhiliye ta‘bîr olunur mülk menzilini mezbûre Afife Hatun târîh-i hüccet-i mezkûrede bana bin guruş semen-i makbûza bey‘ ve temlîk ve mahallinde kabza taslît, ben dahi ber-vech-i muharrer iştirâ ve temellük ve kabûl etmiş idim. Hâlâ bey‘-i mezkûru bi’t-terâzi ikāle edip zikr olunan menzil-i mahdûdu mahallinde kabza mezbûre Afife Hatun’u taslît eylediğimde ol dahi vech-i muharrer üzere kabûl eylediğinden sonra semeni olan meblağ-ı mezbûr bin guruşdan mezbûre Afife Hatun’un zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim ba‘de’l-yevm menzil-i mahdûd-ı mezkûrede benim kat‘an alâkam kalmayıp mezbûre Afife Hatun’un kemâ-fi’l-evvel mülk-i mahzı olmuşdur keyfe mâ teşâ ve tehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 S sene 1153. Şuhûdü’l-hâl: Fahrü’l-kuzât es-Seyyid Ömer Efendi b. İsmail, fahrü’l-kuzât es-Seyyid Ahmed Efendi Bostanzâde, Merhabâzâde Mehmed Emin Efendi, Ali Çelebi b. Hüseyin, Hasan Çelebi b. İbrahim, Mustafa Çelebi b. Mehmed, el-Hâc Mustafa b. el-Hâc Mehmed