Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 270 Hüküm no: 257 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm’ün kızı Hafize’ye nafaka takdiri Bi-imzâ-i efendi Nafaka Mahmiye-i İstanbul’da Tokludede mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan sâhibetü hâzihi’l-vesîka Ümmügülsüm bt. İbrahim nâm hatun meclis-i şer‘-i şerîf-i enverde zevc-i sâbıkı el-Hâc Mehmed b. Ali nâm kimesne mahzarında takrîr-i kelâm ve ta‘bîr ani’l-merâm edip hâl-i zevciyet beynimizde kāim iken mezbûr el-Hâc Mehmed’in firâşından hâsıla ve benden mütevellide ve hâlâ bi-hakkı’l-hıdâne hacr ve terbiyemde olan işbu Hafize nâm sagīrenin mâlı olmayıp nafaka ve kisveye muhtâce olmağla nafaka ve kisve ve sâir levâzım-ı zarûriyesi’çün babası mezbûr üzerine kadr-ı ma‘rûf akçe farz ve takdîr olunmak matlûbumdur dedikde mezbûre Ümmügülsüm’ün takrîr-i meşrûhu vâkı‘a mutâbık ve zikri âtî meblağ kadr-ı ma‘rûf olduğu mezbûr el-Hâc Mehmed ikrâr ve i‘tirâf etmeğin hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīre-i mezbûrenin nafaka ve kisve ve sâir levâzım-ı zarûriyesi’çün babası mezbûr el-Hâc Mehmed Efendi’ye işbu târîh-i vesîkadan yevmî yedişer akçe farz ve takdîr edip meblağ-ı mefrûz-ı mezkûru yevmî yedişer akçeyi ber-vech-i muharrer sagīre-i mezbûreye harc ü sarfa ve lede’l-hâce istidâne ve vakt-i zaferde mezbûr el-Hâc Mehmed Efendi’ye rücû‘a mezbûre Ümmügülsüm’e izin vermeğin mâ-vaka‘a bi’t-taleb ketb olundu. Fî 13 S sene 1153. Şuhûdü’l-hâl: el-Hâc İvaz b. el-Hâc Mehmed, Kara Halil Efendi b. el-Hâc Ahmed Efendi, Molla Mustafa b. Salih, Mustafa Beşe b. Hüseyin, Molla İbrahim b. Ahmed, Abdüsselam b. Abdullah