Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 271 Hüküm no: 258 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Habib’in yanında olan Tevhide’ye damadı Abdi Çelebi’den nafaka bağlandığı Sulh Mahrûse-i Galata muzâfâtından Tophane kasabasında Ağa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fâtıma bt. Habib nâm hatun meclis-i şer‘-i hatîr-ı lâzımü’t-tevkīrde sâbıkā dâmâdı işbu bâ‘isü’l-vesîka Abdi Çelebi b. Abdullah nâm kimesne mahzarında ikrâr ve takrîr-i kelâm edip mezbûr Abdi Çelebi’nin firâşından hâsıla merkūm müteveffiye Zeyneb bt. Ebubekir b. Abdullah’dan mütevellide Tevhide nâm sagīrenin bâ-hüccet-i şer‘iyye nafaka-i mefrûzasından yirmi yedi ayda mezbûr Abdi Çelebi zimmetinde müctemi‘ elli dört guruşu mezbûr Abdi Çelebi’den taleb ve da‘vâ sadedinde iken beynimizde muslihûn tavassut edip da‘vâ-yı mezkûremden beni mezbûr Abdi Çelebi ile yirmi beş guruşa inşâ-i akd-i sulh eylediklerinde ben dahi ber-vech-i muharrer sulh-ı mezkûru ba‘de’l-kabûl bedel-i sulh olan meblağ-ı mezbûr yirmi beş guruşu mezbûr Abdi Çelebi yedinden tamâmen ahz u kabz edip mâ‘adâ yirmi dokuz [guruşa] müte‘allıka âmme-i da‘vâdan mezbûr Abdi Çelebi’nin zimmetini ibrâ ve ıskāt eylediğimde ol dahi bedel-i sulh olmak üzere bana medfû‘u olan meblağ-ı mezbûr yirmi beş guruşa müte‘allıka âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 S sene 1153. Şuhûdü’l-hâl: Mustafa b. Mehmed, Mehmed b. İbrahim, Mustafa b. el-Hâc Mehmed, el-Hâc Mustafa b. el-Hâc Mehmed