Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 275 Hüküm no: 264 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın oğlu Mehmed’e nafaka takdiri Nafaka Mahmiye-i İstanbul’da Avratpazarı kurbünde Haseki Sultan mahallesinde sâkine ve zâtı ta‘rîf-i şer‘î ile mu‘arrefe olan râfi‘atü hâzihi’l-kitâb Âişe bt. Abdullah nâm hatun meclis-i şer‘-i hatîr-ı lâzımü’t-tevkīrde zevc-i sâbıkı Ali b. Mehmed nâm kimesne mahzarında takrîr-i kelâm ve ta‘bîr ani’l-merâm edip mezbûr Ali’nin firâşından hâsıl ve benden mütevellid ve hâlâ bi-hakkı’l-hıdâne hacr ve terbiyemde olan işbu sadrî sagīr oğlum Mehmed’in nafaka ve kisveye eşedd-i ihtiyâcı olmağla nafaka ve kisvesi’çün babası mezbûr Ali üzerine taraf-ı şer‘-i enverden kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb bi-tevkī‘ihi’l-müstetâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisvesi’çün babası mezbûr Ali üzerine târîh-i kitâbdan yevmî dörder akçe farz ve takdîr edip meblağ-ı mefrûz-ı mezkûr dörder akçeyi sagīr-i mezbûrun nafaka ve kisvesine rücû‘a mezbûre Âişe Hatun’a vermeğin mâ-vaka‘a bi’t-taleb ketb olundu. Fî 15 S sene 1153. Şuhûdü’l-hâl: Ahmed Çelebi b. Hüseyin, es-Seyyid Ali Çelebi, Süleyman Çelebi b. Süleyman, Mustafa Çelebi b. Hüseyin, Ali b. Abdullah