Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 275 Hüküm no: 265 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un eşi Abdi’den muhâlaa yoluyla boşandığı Muhâla‘a Mahmiye-i İstanbul’da Aksaray kurbünde Çakır Ağa mahallesinde sâkine olup zâtı Abdurrahman Çelebi b. Mehmed ve Salih Çelebi b. Ali nâm kimesneler ta‘rîfleriyle mu‘arrefe olan Hadîce bt. Mustafa nâm hatun meclis-i şer‘-i hatîr-ı lâzımü’t-tevkīrde zevc-i dâhili bâ‘is-i hâze’l-kitâb Abdi b. Halil nâm kimesne mahzarında ikrâr ve takrîr-i kelâm edip mezbûr Abdi zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 16 S sene 1153. Şuhûdü’l-hâl: Mustafa b. Mehmed, Ali b. Abdullah, el-Hâc Mustafa Arabzâde, Abdurrahman Çelebi b. Mehmed, Salih Çelebi b. Ali, Mehmed b. Ahmed, Mehmed b. Mahmud, Ahmed b. Abdullah, Mehmed b. Ali