Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 276 Hüküm no: 266 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zartar adlı Nasraniye’nin çocuklarına nafaka takdiri Nafaka Mahmiye-i İstanbul’da İmrahor mahallesi sâkinelerinden olup şahsı ta‘rîf-i şer‘î ile mu‘arrefe olan bâ‘isetü hâzihi’l-vesîka Zartar bt. Norses nâm Nasrâniye meclis-i şer‘-i hatîr-ı lâzımü’t-tevkīrde sadrî kebîr oğlu Mehmed b. Abdullah nâm mühtedî ile sadrî kebîr oğlu Abraham nâmey zimmîler ve sadriye kebîre kızları Gül ve Gonca nâm Nasrâniyeler muvâcehesinde takrîr-i kelâm ve ta‘bîr ani’l-merâm edip ben mu‘dime ve mu‘sire ve alîle ve kâr [u] kisbe iktidârım olmayıp nafaka ve kisveye ihtiyâcım olmağla kıbel-i şer‘den merkūmûn oğullarım ve kızlarım üzerlerine kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi mezbûre Zartar Nasrâniye’nin nafaka ve kisve ve sâir levâzım-ı zarûriyesi’çün oğulları Mehmed ve Abraham ve kızı Gül üzerlerine târîh-i kitâbdan bi’t-terâzi küllü yevm birer paradan cem‘an üç para ve kızı mezbûre Gonca Nasrâniye üzerine kezâlik bi’t-terâzi küllü yevm ikişer akçe farz ve takdîr edip meblağ-ı mefrûz-ı mezbûru mezbûre Zartar Nasrâniyenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer mezbûrûn Mehmed ve Abraham ve Gül ve Gonca Nasrâniyelerden her biri üzerine bi-kadri’l-hısâs rücû‘a mezbûre Zartar Nasrâniyeye izin birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: es-Seyyid Mustafa b. es-Seyyid Hasan, Ali b. Abdullah, Şa‘bân b. Ahmed, es-Seyyid Ali