Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 276 Hüküm no: 267 Orijinal metin no: [37b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in çocuklarına nafaka takdiri Nafaka Mahmiye-i İstanbul’da Hoca Üveys mahallesinde sâkine ve zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan bâ‘isetü hâzihi’l-vesîka Rukiye bt. Mehmed nâm hatun meclis-i şer‘-i hatîr-ı lâzımü’t-tevkīrde zevc-i sâbıkı İbrahim Beşe b. el-Hâc Mehmed nâm kimesne mahzarında takrîr-i kelâm ve ta‘bîr ani’l-merâm edip mezbûr İbrahim Beşe’nin firâşından hâsılalar ve benden mütevellideler hâlâ bi-hakkı’l-hıdâne hacr ve terbiyemde olan işbu kızlarım Hibetullah ve Emine nâm sagīreler nafaka ve kisveye eşedd-i ihtiyâcları olmağla babaları mezbûr İbrahim Beşe üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīretân-ı mezbûretânın nafaka ve kisve ve sâir levâzım-ı zarûriyeleri’çün babaları mezbûr İbrahim Beşe üzerine târîh-i kitâbdan bi’t-terâzi her birine yevmî beşer akçeden cem‘an on akçe nafaka ve kisve-bahâ farz ve takdîr buyurup meblağ-ı mefrûz-ı mezkûru sagīretân-ı mezbûretân Hibetullah ve Emine’nin nafaka ve kisve ve sâir levâzım-ı zarûriyelerine harc ü sarfa ve lede’l-iktizâ istidâneye ve inde’z-zafer babaları mezbûr İbrahim Beşe üzerine rücû‘a mezbûre Rukiye Hatun’a izin birle mâ-vaka‘a bi’t-taleb ketb olundu. Fî 16 S sene 1153. Şuhûdü’l-hâl: Salih Ağa b. Süleyman, el-Hâc Mustafa b. el-Hâc Mehmed, Solak Mustafa b. el-Hâc Mehmed, Kayıkcı Mustafa b. Mehmed, Üsküdarî Ali Çelebi