Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 277 Hüküm no: 268 Orijinal metin no: [37b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Yusuf b. Abdullah’ı azat ettiği Dergâh-ı âlî yeniçerilerinin Haseki ağalarından olup mahmiye-i İstanbul’da Muhtesib Karagöz mahallesinde sâkin fahrü’l-emâsil ve’l-akrân Ahmed Ağa b. Süleyman b. Abdullah tarafından ıtk-ı âti’z-zikri ikrâra vekîl olduğu İbrahim Beşe b. Mustafa ve diğer İbrahim Beşe b. Osman şehâdetleriyle ber-nehc-i şer‘î sâbit olan kul çavuşlarından Abdulkadir Çavuş Ağa b. Ali meclis-i şer‘-i şerîf-i Ahmedî ve mahfil-i dîn-i münîf-i Muhammedî’de müvekkil-i mûmâ-ileyhe rıkkiyetini mu‘terif olan orta boylu, kara kaşlı, kara gözlü, kumral bıyıklı, bâ‘isü’l-vesîka Yusuf b. Abdullah nâm gulâm muvâcehesinde bi’l-vekâle ikrâr-ı tâm ve takrîr-i kelâm edip müvekkilem mûmâ-ileyh Ahmed Ağa gulâm-ı mevsûf-ı mezbûr Yusuf’u hasbeten lillâhi’l-meliki’s-samed ve taleben li-merzâti Rabbihi’l-ahad mâlından tahrîr ve i‘tâk ve ahrâr-ı asliyyîn zümresine idrâc ve ilhâk eyledi ba‘de’l-yevm gulâm-ı mevsûf-ı mezbûr Yusuf sâir ahrâr-ı asliyyîn gibi hürre olup üzerinde velâ-i şer‘îden gayrı hakkı bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 S sene 1153. Şuhûdü’l-hâl: Ahmed Çelebi b. Şa‘bân, Abdullah Çavuş b. Abdullah, Mustafa b. el-Hâc Mehmed, Mehmed Beşe b. Mustafa, İbrahim Beşe b. Mustafa, İbrahim b. Osman, Mehmed Ali b. Abdullah, Mehmed Çelebi b. İbrahim, Mehmed Çelebi b. Ahmed, Hüseyin Çelebi b. el-Hâc Mehmed