Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 281 Hüküm no: 270 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Beşe’nin evini Nimetullah Hatun’a sattığı ve Nimetullah Hatun’un da İbrahim Efendi Vakfı’ndan olan evin hariciyesini Yusuf Beşe’ye verdiği Mübâya‘a Mahmiye-i İstanbul’da Hasan Halîfe mahallesinde sâkin Yusuf Beşe b. Abdullah nâm kimesne meclis-i şer‘-i hatîr-ı lâzımü’t-tevkīrde yine mahalle-i mezbûre[de] sâkine zâtını ârifân Ahmed Efendi b. el-Hâc İbrahim ve Ali Çelebi b. Mehmed nâm kimesneler ta‘rîfleriyle mu‘arrefe râfi‘atü hâze’l-kitâb Nimetullah Hatun bt. Bayram mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup civâr-ı Saltanat-ı Aliyye’den medîne-i Üsküdar’da Devatcılar kurbünde Kadıasker mahallesinde vâki‘ bir tarafdan benim âhar mülk menzilim ve bir tarafdan Abdülkerim Ağa mülk menzili ve bir tarafdan İbrahim Çelebi mülk menzili ve bir tarafdan tarîk-i hâs ile mahdûd fevkānî üç bâb oda ve tahtânî bir bâb oda ve bir bi’r-i mâ ve bir mikdâr havlu ve bir kenîfi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mezbûre Nimetullah Hatun’a iki yüz elli guruşa bey‘ ü teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezbûr iki yüz elli guruş ile yedimden makbûz kırk guruş bedel mukābelesinde müşteriye-i mezbûre Nimetullah Hatun, İbrahim Efendi nâm sâhibü’l-hayr Vakfı’ndan zikr olunan Hasan Efendi mahallesinde vâki‘ ma‘lûmü’l-hudûd ve’l-müştemilât tasarrufundaki menzilin hâriciyesini mütevellîsi ma‘rifetiyle yedime verdiği temessük mantûkunca bana tefvîz eyledikde ben dahi tefevvüz ve kabûl edip evvelâ zikr olunan menzil-i mahdûd-ı mezkûr müşteriye-i mezbûrenin mülk-i müşterâsı olup sâniyen zikr olunan hâriciye menzil benim hakk-ı müfevvezim olmağın fîmâ-ba‘d zikr olunan mülk menzil ve vakf-ı hâriciyenin gabn ü tağrîrine ve semen ve bedel-i mezkûrânın istîfâ ve sâir husûslarına müte‘allıka âmme-i de‘âvî ve mutâlebât ve kâffe-i eymân ve muhâsamâtdan her birimiz âharın zimmetini ibrâ-i âmm-ı râfi‘ü’l-hısâm ve katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 16 S sene 1153. Şuhûdü’l-hâl: Mehmed Beşe b. Ahmed, Ali Çelebi b. Mehmed, Berber el-Hâc İbrahim, Ahmed Efendi b. el-Hâc İbrahim, es-Seyyid Mehmed Çelebi b. es-Seyyid Mustafa, zübdetü’l-meşâyihi’l-kirâm es-Seyyid eş-Şeyh Mehmed Nurullah Efendi himmetîzâde, el-Hâc Mustafa b. Hacı Mehmed, Kayıkcı Mustafa b. Mehmed, Ahmed Çelebi b. Hasan ve gayruhum