Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 282 Hüküm no: 271 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turhan Hatun’un bazı eşyalarını Fatıma Hatun’a sattığı Mübâya‘a-i eşyâ Mahmiye-i İstanbul’da Hoşkadem mahallesinde sâkine Turhan bt. Ali b. Abdülmennan nâm hatun tarafından bey‘-i âti’z-zikri ikrâra vekîl olduğu zât-ı mezbûreyi bi’l-ma‘rifeti’ş-şer‘iyye ârifân el-Hâc Abdurrahman Efendi b. Ali ve Süleyman Efendi b. Ahmed nâm kimesneler şehâdetleriyle ber-nehc-i şer‘î sâbit olan el-Hâc Hüseyin b. el-Hâc Abdullah nâm kimesne meclis-i şer‘-i hatîr-ı lâzımü’t-tevkīrde bâ‘isetü hâzihi’l-vesîka Fâtıma bt. Abdurrahman nâm hatun mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Turhan zikri âtî akdin sudûruna değin yedimde mülk ve hakkım olan eşyâmdan otuz dirhem bir sîm kuşak ve sekiz miskāl bir denk ve bir çift altın bilezik ve bir anteri ve iki köhne yorgan ve bir döşek ve bir yasdık ve bir ıbrık ve bir bakrac ve iki sagīr sahan ve bir kebîr tencere ve iki tâbe ve üç sagīr tencereyi tarafeynden îcâb ve kabûlü hâvî ve tağrîr ve gabnden ârî bey‘-i kat‘î ve safka-i vâhide ile merkūme Fâtıma Hatun’a altmış guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve kabz ve tesellüm ve kabûl eylediğinden sonra semen-i mebî‘-i mezkûr altmış guruşu merkūme Fâtıma Hatun yedinden tamâmen ahz u kabz eyledim min-ba‘d eşyâ-i muharrere-i mezkûrede benim kat‘an alâka ve medhalim kalmayıp merkūme Fâtıma Hatun’un mülk-i müşterâsıdır dedi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 17 S sene 1153. Şuhûdü’l-hâl: Ali Çelebi b. İbrahim, el-Hâc Davud yağlıkçı, Veliyüddin b. Abdullah, el-Hâc Mustafa Arabzâde