Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 282 Hüküm no: 272 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kulu v. Kino’nun Ahmed b. Abdullah’daki alacağı konusundaki davanın sulh ile sonuçlandığı Mahmiye-i İstanbul’da Saraçhanebaşı’nda vâki‘ ekmekçi kurbünde sâkin işbu bâ‘isü’s-sifr Kulu v. Kino nâm zimmî meclis-i şer‘-i hatîr-ı lâzımü’t-tevkīrde Ahmed b. Abdullah nâm kimesne mahzarında ikrâr-ı tâm ve takrîr-i kelâm edip mezbûr Ahmed zimmetinde cihet-i deyn-i şer‘îden hakkım olan altmış beş guruşun bundan akdem otuz guruşunu mezbûr Ahmed bana edâ ve teslîm edip hâlâ otuz beş guruşu mezbûr Ahmed zimmetinde bâkī kalmağla meblağ-ı bâkī-yi mezbûr otuz beş guruşu merkūm Ahmed’den taleb ve da‘vâ sadedinde iken beynimizde muslihûn tavassut edip da‘vâ-yı mezkûrumdan beni mezbûr Ahmed ile yirmi beş guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh olan meblağ-ı mezbûr yirmi beş guruşu mezbûr Ahmed yedinden tamâmen ahz u kabz eyledim ba‘de’l-yevm meblağ-ı mezbûrun mâ‘adâsına ve sâire müte‘allıka âmme-i da‘vâdan her birimiz âharın zimmetini ibrâ-i âmm-ı râfi‘ü’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 17 S sene 1153. Şuhûdü’l-hâl: Abdullah Çelebi b. Mehmed, Mumcu Yakub Beşe el-mübâşir, Ali Çelebi b. Abdullah, Mehmed Çelebi b. İbrahim, el-Hâc Mustafa b. Hacı Mehmed, es-Seyyid Mustafa Çelebi b. es-Seyyid Hasan, Solak Mustafa b. Hacı Mehmed