Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 283 Hüküm no: 273 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hasan’ın değirmen ve tarlalarını Veliyüddin Efendi’ye sattığı, Veliyüddin Efendi’nin de arsa ve bazı tarlalarını Molla Hasan’a sattığı Mübâya‘a Mahmiye-i İstanbul’da Çarşambapazarı kurbünde Beyceğiz mahalle[sinde] sâkin Molla Hasan b. İbrahim nâm kimesne meclis-i şerîf-i enverde işbu bâ‘isü’l-vesîka el-Hâc Veliyüddin Efendi b. Osman nâm [kimesne] mahzarında ikrâr-ı tâm ve takrîr-i kelâm edip silk-i mülk-i sahîhimde münselik emlâkimden olup vilâyet-i Anadolu’da Birgi kazâsı nevâhîsinden Bandegömü nâhiyesine tâbi‘ Çayır nâm karyede vâki‘ bir tarafdan mâ-i cârî ve bir tarafdan dere ve bir tarafdan Kamuşukoğlu tarlası ve bir tarafdan tarîk-i âm ile mahdûd iki göz mülk su değirmeni ve yine karye-i merkūmede vâki‘ köşk tarlası demekle ma‘rûf bir tarafdan Hatîbzâde tarlası ve bir tarafdan el-Hâc Mustafa tarlası ve bir tarafdan benim âhar tarlalarım ve taraf-ı râbi‘i tarîk-i âm ile mahdûd iki buçuk dönüm mülk tarlamı ve yine karye-i merkūmede vâki‘ Saraylı tarlası demekle arîf bir tarafdan Koçmaroğlu İsmail ve bir tarafdan Abdurabbinnebi oğlu Mustafa ve bir tarafdan Köşkoğlu Mehmed tarlaları ve taraf-ı râbi‘i tarîk-i âm ile mahdûd bir dönüm mülk tarlamı mezbûr el-Hâc Veliyüddin Efendi’nin yedinde mülk ve hakkı olup karye-i merkūmede bir tarafdan Osman mülkü ve bir tarafdan benim mülküm ve bir tarafdan Hatîbzâde Ali Beşe mülkü ve bir tarafdan tarîk-i âm ile mahdûd mülk menzil arsasıyla yine karye-i mezbûrede vâki‘ bir tarafdan ırmak ve bir tarafdan Macari? ve bir tarafdan Halil tarlası ve bir tarafdan ba‘zan el-Hâc Hüseyin oğlu tarlası ve ba‘zan tarîk-i âm ile mahdûd kestanelik tarlası demekle ma‘rûf iki dönüm mülk tarla ile seksen guruşa alâ-tarîkı’l-mukāyaza mezbûr el-Hâc Veliyüddin Efendi’ye temlîk ve her birini mahallerinde kabz ve tasarrufumda tarafımdan taslît eylediğimde ol dahi ba‘de’t-temellük ve’l-kabûl menzil arsasıyla tarlayı bana temlîk ve mahallinde kabz ve tasarrufa tarafından beni tastît eyledikde ben dahi temellük ve kabûl ve meblağ-ı mezbûr seksen guruşu yedinden tamâmen ahz u kabz eylediğimden sonra husûs-ı mezbûrlara ve sâir hukūka müte‘allıka kalîl ü kesîr, celîl ü hakīr âmme-i de‘âvî ve muhâsamâtdan ve kâffe-i mutâlebât ve eymândan her birimiz âharın zimmetini ibrâ ve ıskāt eyledik ba‘de’l-yevm tahdîd olunan değirmen ve iki tarlalar mezbûr el-Hâc Veliyüddin Efendi’nin mülkü olup benim kat‘an alâka ve medhalim kalmayıp ve arsa-i mahdûde-i mezkûre ile tarla benim mülküm olup mezbûr el-Hâc Veliyüddin Efendi’nin kat‘an alâka ve medhali kalmamışdır, tarafeyn ber-vech-i muharrer mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 S sene 1153. Şuhûdü’l-hâl: Çukadâr Mehmed b. Abdullah, Süleyman b. Abdullah, Sarrâc Mustafa b. Ali, Hasan b. Mustafa, Mustafa Çelebi b. el-Hâc Ali, Abdulkadir Ağa b. Ali, Kandil Süleyman Ağa b. Abdullah, Mehmed Beşe b. Halil, İsmail b. Abdurabbinnebi, el-Hâc Süleyman b. Mehmed