Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 284 Hüküm no: 274 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Hasan’ın eşi Abdüsselam’dan muhâlaa yoluyla boşandığı Mahmiye-i İstanbul’da Defterdâr Ahmed Çelebi mahallesinde sâkine olup zâtı eş-Şeyh Abdulkadir Efendi b. Abdullah ve Süleyman Ağa b. Salih nâm kimesneler ta‘rîfleriyle mu‘arrefe olan Havva bt. Hasan nâm hatun meclis-i şer‘-i şerîf-i enverde zevc-i dâhili bâ‘isü’l-kitâb Abdüsselam b. Abdülfettah nâm kimesne mahzarında ikrâr ve takrîr-i kelâm edip mezbûr Abdüsselam zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Abdüsselam ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan ben mezbûr Abdüsselam’ın zimmetini ibrâ ve ıskāt eylediğimde ol dahi kezâlik hukūk-ı zevciyete ve beynimizde ma‘lûm bir çuka ferâceye müte‘allıka âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 S sene 1153. Şuhûdü’l-hâl: eş-Şeyh Abdulkadir b. Abdullah, Ahmed Çelebi b. Hasan, el-Hâc Mustafa b. el-Hâc Mehmed, Süleyman Ağa b. Salih