Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 285 Hüküm no: 275 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Saliha Hanım’ın Adilhan adlı cariyesini azat ettiği Hilâl-i sütûr-ı meymenet-mastûrda münderic olan husûsun mahallinde ketb ü tahrîri için bi’l-iltimâs bu fakīr sâbıkā mesned-tırâz-ı sadr-ı Rum olan a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘ü’l-fezâil ve’l-me‘âlî metbû‘ü’l-efâzıl ve’l-e‘âlî alemü’l-ilmi ve’l-hüdâ menârü’l-fazli ve’t-tekā devletli inâyetli âtıfetli es-Seyyid Zeynelabidin Efendi necli’l-merhûm el-mebrûr ed-dâricü ilâ-medârici rahmeti rabbühü’l-gafûr Ak Mahmud Efendi hazretlerinin mahmiye-i İstanbul’da Pirinçci Sinan mahallesinde vâki‘ sa‘âdethânelerine varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî olundukda müşârün-ileyh hazretlerinin halîle-i muhteremeleri umdetü’l-muhadderât zübdetü’l-muvakkarât iffetlü ve ismetlü Hacce Saliha Hanım bt. el-merhûm el-mebrûr Şeyhülislâm-ı esbak Ebezâde Abdullah Efendi taraf-ı bâhirü’ş-şereflerinden ikrâr-ı âti’z-zikre vekîl olduğu ber-nehc-i şer‘î sâbit olan fahrü’l-kuzâti’l-kirâm İmâmzâde Mehmed Efendi b. el-Hâc Ebubekir meclis-i ma‘kūd-ı mezkûrda müvekkile-i müşârün-ileyhâya rıkkıyetini mu‘terife olan orta boylu, kara kaşlı, kara gözlü, Rusiyyetü’l-asl Adilhan bt. Abdullah nâm câriye muvâcehesinde bi’l-vekâle ikrâr-ı tâm ve takrîr-i kelâm edip müvekkilem müşârün-ileyhâ mevsûfe-i mezbûre Adilhan’ı hasbeten lillâhi’l-meliki’s-samed ve taleben li-merzâti Rabbihi’l-ahad cemî‘ mâllarından tahrîr ü i‘tâk ve harâir-i asliyât zümresine idrâc ü ilhâk etmeleriyle mevsûfe-i mezbûre sâir harâir-i asliyât zümresine idrâc ve ilhâk etmeleriyle mevsûfe-i mezbûre sâir harâir-i asliyât gibi hürre olup üzerinde velâ-i şer‘îden gayrı hakkı bâkī kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 18 S sene 1153. Şuhûdü’l-hâl: İmâm Hüseyin Efendi, es-Seyyid el-Hâc Mustafa Efendi, Mehmed Efendi Tezkirecizâde, Altıparmakzâde Şekib Efendi, Üsküdarî Yahya Efendi, Beyzâde Mustafa Efendi, Ayıntâbî el-Hâc Mustafa Efendi