Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 285 Hüküm no: 276 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide Hanım’ın İshak Efendi’den alacağı konusundaki davaya sulh bedeli karşılığı son verildiği Mahmiye-i İstanbul’da Kâtib Muslihiddin mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Hamide bt. Mehmed nâm hatun meclis-i şer‘-i hatîr-ı lâzımü’t-tevkīrde işbu bâ‘isü’l-kitâb İshak Efendi b. el-Hâc Abdullah nâm kimesne mahzarında ikrâr ve takrîr-i kelâm edip bundan akdem mezbûr İshak Efendi yedinden bi’d-defa‘ât yüz yirmi üç guruş ahz u kabz edip meblağ-ı mezbûru kendüye edâ ve teslîm eylediğimden sonra mâ‘adâ akçe fâidesi ve menzil icâresi deyü benden yetmiş üç guruş ziyâde ahz u kabz etmekle meblağ-ı mezbûr ziyâdeyi mezbûr İshak Efendi’den taleb ve da‘vâ sadedinde olduğumda beynimizde nizâ‘-ı küllî cereyân etmiş idi, el-hâletü hâzihi beynimizde muslihûn tavassut edip da‘vâ-yı mezkûremden beni yirmi guruş üzerine inşâ-i akd-i sulh ettiklerinde ben dahi sulh-ı mezkûru ba‘de’l-kabûl bedel-i sulh olan meblağ-ı mezbûr yirmi guruşu mezbûr İshak Efendi yedinden tamâmen ahz u kabz edip fîmâ-ba‘d husûs-ı mezkûra ve sâire müte‘allıka âmme-i da‘vâdan mezbûr İshak Efendi’nin zimmetini ibrâ ve ıskāt eylediğimde ol dahi bedel-i sulh deyü bana medfû‘u olan yirmi guruşa müte‘allıka âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 S sene 1153. Şuhûdü’l-hâl: es-Seyyid Ali Çelebi b. Mustafa, es-Seyyid Mustafa Çelebi b. es-Seyyid Hasan, el-Hâc Mustafa b. el-Hâc Mehmed, Mustafa Çelebi b. Mehmed, Ahmed Ağa b. Mahmud