Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 286 Hüküm no: 277 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın istiğlâl yoluyla nukud vakfı için mütevelli İbrahim b. Hasan’a evini sattığı Mahmiye-i İstanbul’da Arabacı Bayezid mahallesi sâkinelerinden olup zâtı mahalle-i mezbûre İmâmı Hamdullah Efendi b. el-Hâc Mehmed ve Müezzin Mehmed Çelebi b. Salih ta‘rîfleriyle mu‘arrefe olan Emine bt. Abdullah nâm hatun meclis-i şer‘-i hatîr-ı lâzımü’t-tevkīrde kendinin mevlidü’n-nebî dersiye için akāra tebdîlini şurût eylediği nukūd-ı mevkūfesine ber-vech-i meşrûta mütevellîsi olan bâ‘is-i hâze’l-kitâb el-Hâc İbrahim b. el-Hâc Hasan mahzarında ikrâr-ı tâm ve takrîr-i kelâm edip zikri câî akdin sudûruna değin yedimde mülk ve hakkım olup mahalle-i mezbûrede vâki‘ bir tarafdan Pazarcı Ahmed mülkü ve bir tarafdan Hadîce Hatun mülkü ve iki tarafdan tarîk-i âm ile mahdûd tahtânî iki bâb oda ve iki sofa ve bir matbah ve bir mağsel ve bir bi’r-i mâ ve iki kenîf ve bir mikdâr bahçeyi müştemil mülk menzilimi vakf-ı mezbûra akār olmağiçün tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mütevellî-yi mezbûr el-Hâc İbrahim Efendi’ye yüz kırk guruşa bey‘ ve teslîm eylediğimde ol dahi nafaka-i mevkūfesiyle bi’t-tevliye iştirâ ve tesellüm edip semen-i mezkûrun yetmiş guruşunu mâl-ı vakf-ı mezbûr olmak üzere bana def‘ ü teslîm ben dahi yedinden ahz u kabz eyleyip menzil-i mahdûd-ı mezkûr vakf-ı mezbûr müstagallâtından oldukdan sonra mütevellî-yi mezbûr el-Hâc İbrahim Efendi menzil-i mahdûd-ı mezkûru yetmiş guruş icâre-i mu‘accele-i misli ve yevmî bir akçe icâre-i müeccele mümâsili ile bi’t-tevliye bana îcâr ve teslîm ben dahi ber-vech-i muharrer istîcâr ve kabûl edip semen-i mezkûrdan mütevellî-yi mezbûr zimmetinde bâkī kalan yetmiş guruşu mu‘accele-i mezkûre yetmiş guruşa takas ve mahsûb eylediğimde ol dahi ber-vech-i meşrûh mukāssa ve kabûl eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 17 S sene 1153. Şuhûdü’l-hâl: el-Hâc Mustafa b. el-Hâc Mehmed, İmâm Hamdullah Efendi b. el-Hâc Mehmed, Mehmed Çelebi b. Mehmed, Abdullah Çelebi b. Mehmed, Çardak Kâtibi es-Seyyid Hasan Efendi, Müezzin Ömer Çelebi ma‘cûnî, Müezzin Mehmed Çelebi, el-Hâc İsmail Efendi b. Mehmed