Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 287 Hüküm no: 278 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un eşi Yusuf’tan muhâlaa yoluyla boşandığı Mahmiye-i İstanbul’da Debbâğ Yunus mahallesinde sâkine ve zâtı zeyl-i vesîkada muharrerü’l-esâmî Muslimîn ta‘rîfleriyle mu‘arrefe olan Âişe bt. Süleyman nâm hatun meclis-i şer‘-i hatîr-ı lâzımü’t-tevkīrde zevc-i dâhili işbu bâ‘isü’l-vesîka Yusuf b. Abdullah nâm kimesne mahzarında ikrâr-ı tâm ve takrîr-i kelâm edip mezbûr Yusuf zevcim olup beynimizde hüsn-i zindegânemiz olmamağla zimmetinde mütekarrer ve ma‘kūdün-aleyh bin iki yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Yusuf ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezkûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 S sene 1153. Şuhûdü’l-hâl: Hasan Çelebi b. Mehmed, Mehmed Çelebi b. İbrahim, Mustafa b. Mehmed, el-Hâc Mustafa b. el-Hâc Mehmed, Mübâşir Mehmed Beşe, İbrahim Beşe b. Ahmed, Abdullah Beşe b. Halil, Halil Beşe b. İbrahim