Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 287 Hüküm no: 279 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Abdullah’ın Emine Hanım’da olan alacağını tahsil ettiği Mahmiye-i İstanbul’da Küçük Ayasofya mahallesinde sâkine ve zâtı Salih b. Abdullah ve el-Hâc Mustafa b. Mehmed nâm kimesneler ta‘rîfleriyle mu‘arrefe olan Hanife bt. Abdullah nâm hatun meclis-i şer‘-i şerîf-i enverde yine mu‘arrifân-ı mezbûrân ta‘rîfleriyle mu‘arrefe olan sâhibetü hâzihi’l-vesîka Emine Hanım bt. İbrahim Bey b. Abdurrahman Bey tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Ali Efendi b. Abdullah nâm kimesne mahzarında ikrâr-ı tâm ve takrîr-i kelâm edip müvekkile-i mezbûre Emine Hanım bundan akdem işbu hâzıra bi’l-meclis Safiye bt. Abdullah nâm hatun vesâletiyle benden istikrâz ve kabz eylediği altı yüz guruşun üç yüz yetmiş beş guruşu bi’d-defa‘ât bana edâ ve teslîm ben dahi yedinden ahz u kabz edip iki yüz yirmi beş guruşu zimmetinde bâkī kalmış idi, hâlâ meblağ-ı bâkī-yi mezbûr iki yüz yirmi beş guruşu müvekkile-i mezbûre Emine bana edâ ve teslîm etmekle meblağ-ı mezbûr altı yüz guruşdan müvekkile-i mezbûre zimmetinde bir akçe ve bir habbe hakkım kalmamağla mezbûre Safiye’nin ve müvekkile-i mezbûre Emine Hanım’ın zimmetlerini meblağ-ı mezbûra müte‘allıka da‘vâdan ibrâ ve ıskāt eyledim dedikde gıbbe’t-tasdîk hıfzan li’l-makāl işbu hurûf bi’t-taleb ketb olundu. Fî 16 S sene 1153. Şuhûdü’l-hâl: Hamza Efendi b. Receb, Molla Ömer b. Ahmed, Molla Mehmed b. Ahmed, Mustafa b. Abdülcelil, eş-Şeyh Mahmud b. Mehmed, Molla Mehmed b. Süleyman