Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 292 Hüküm no: 282 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin vakfiye şartlarına uygun olarak tasarruf ettiği eve müdahale edilmemesi Bi-imzâ-i efendi Mahmiye-i İstanbul’da Şehzâde Câmi‘-i şerîfi kurbünde sâkin sâhib-i hâzihi’l-vesîka Mehmed Efendi b. Mustafa nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip ashâb-ı hayrâtdan merhûme Elöz? nâm hatun mahmiye-i mezbûrede Ali Paşa-i atîk mahallesinde vâki‘ lede’l-ahâlî ma‘lûmü’l-hudûd ve’l-müştemilât fevkānî ve tahtânî mülk menzilini işbu yedimde olan vakfiye-i ma‘mûlün-bihâ nâtık olduğu üzere vakf ve habs edip tevliyet ve süknâsı evvelâ kendüye ba‘dehâ evlâd-ı evlâd-ı evlâdına ve ba‘de’l-inkırâz mu‘takaları Canfeda ve Timurhan ve evlâdlarına şart ve ta‘yîn eyleyip bi-emrillâhi te‘âlâ mezbûre Timurhan ve evlâdları munkariz olup ceddem mezbûre Canfeda tevliyet-i mezbûreyi müddet-i medîde ve ba‘de vefâtihâ evlâdları zabt u tasarruf edip ben mezbûre Canfeda evlâdlarından olup sinîn-i kesîreden berü tevliyet-i mezbûreye ber-mûceb-i şart-ı vâkıfe mutasarrıf iken ecânibden ba‘zıları hilâf-ı şart-ı vâkıfe dahl ü ta‘arruz murâd ederler husûs-ı mezbûr vukūf-ı tâmmı olan bî-garaz kimesnelerden istihbâr ve haberleri tahrîr ve yedime ihbâr hücceti verilmek matlûbumdur dedikde keyfiyet-i hâl zeyl-i vesîkada muharrerü’l-esâmî bî-garaz Müslimîn istihbâr olundukda vâki‘ hâl mezbûr Mehmed Efendi’nin takrîr-i meşrûhu üzere olduğunu meclis-i şer‘de alâ-tarîkı’ş-şehâde her biri ihbâr etmeleriyle hıfzan li’l-makāl işbu vesîka bi’t-taleb ketb olundu. Fî 18 S sene 1153. Şuhûdü’l-hâl: Salih Çelebi, es-Seyyid Mustafa Ağa b. el-Hâc Ahmed, Abdulkadir b. Lütfullah, Ahmed Efendi b. Mehmed, İmâm Mehmed Efendi