Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 293 Hüküm no: 283 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhaşşî Sadi Efendi Vakfı’na ait evin kiracısı bir süredir kayıp olduğundan gelene kadar evin başkasına kiralanması Ashâb-ı hayrâtdan merhûm Muhaşşî Sadi Efendi Vakfı’nın hâlâ mütevellîsi olan sâhib-i hâzihi’l-vesîka Halil Ağa b. Osman nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip vakf-ı mezbûrdan mahmiye-i İstanbul’da Fethiye Câmi‘-i şerîfi kurbünde Yazıcı mahallesinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb vakıf menzilin mutasarrıfı olan mahalle-i mezbûre ahâlîsinden Mehmed Ağa b. Ahmed nâm kimesne on iki seneden berü gaybet-i munkatı‘a ile gāib ve menzil-i mezbûrun icâresini taraf-ı vakfa edâya vekîli dahi olmayıp sinîn-i mezbûrede icâresi olunmamağla gāib-i mezbûr gelince menzil-i mezbûr âhara îcâr olunmak vakf-ı mezbûra vücûhla evlâ ve enfa‘ ve ahrâ olmağın kıbel-i şerî‘at-i garrâdan ber-vech-i muharrer icâra bana izin verilmek bi’t-tevliye matlûbumdur dedikde mezbûr Halil Ağa’nın takrîr-i meşrûhu vâkı‘a mutâbık ve nefsü’l-emre muvâfık olduğu ahâlî-i mahalle-i mezbûreden zeyl-i vesîkada muharrerü’l-esâmî sikāt-ı sahîhatü’l-kelimâtdan bî-garaz Müslimîn ihbârlarıyla lede’ş-şer‘i’l-enver mütehakkık ve mukarrer olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi menzil-i mezbûru ber-vech-i mübeyyen îcâra mütevellî-yi mezbûra izin vermeğin işbu vesîka-i enîka bi’t-taleb ketb olundu. Fî 17 S sene 1153. Şuhûdü’l-hâl: Ahmed Efendi b. Mustafa, es-Seyyid Halil Ağa b. Yahya, İmâm Ahmed Efendi b. el-Hâc Halil Efendi, Müezzin Halil Halîfe b. İbrahim, Ahmed b. Mahmud, Ahmed Efendi b. Mustafa, Mehmed Emin b. Mustafa