Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 294 Hüküm no: 284 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe ve Zeliha Hatun’un muharebede şehit olan Hüseyin Ağa’nın varisleri olduğu Vilâyet-i Rumeli’nde Opar kazâsına tâbi‘ Varvara nâm karye ahâlîsinden olup mahmiye-i İstanbul’da Yedikule kapısı hâricinde kasablar kârhânesinde müsâfiren sâkin olup kendi nefsinden asâleten ve yine karye-i mezbûrda sâkine Zeliha bt. İbrahim b. Abdullah nâm hatun tarafından vekâleten ber-vech-i âtî verâset iddi‘â eden işbu râfi‘ü’l-kitâb Mehmed Beşe b. Hasan nâm kimesne meclis-i şer‘-i hatîr-ı lâzımü’t-tevkīrde fi’l-asl karye-i mezbûre ahâlîsinden olup mahmiye-i mezbûrede İskender Ağa mahallesi ahâlîsinden hâlâ Belgrad Defterdârı umdetü erbâbi’t-tahrîr ve’l-kalem Ahmed Efendi hazretlerinin etbâ‘ından iken bundan akdem Hisarcık ma‘rekesinde şehîden vefât eden Hüseyin Ağa b. diğer Hasan b. mezbûr Hasan’ın müfredât defteri mantûkunca yanında mevcûd olan eşyâ-i ma‘lûme ile hayâtında defterdâr-ı mûmâ-ileyhin mahalle-i mezbûrdaki menzilinde îdâ‘ eylediği emti‘a-i mütenevvi‘a ile memlû ve mukaffel bir sandığına vâzı‘ayi’l-yed olan Osman Ağa b. (°) ve Mehmed Ağa b. Osman b. Mehmed nâm kimesneler taraflarından zikri âtî husûsu husûmetine vekîl olduğu Ali Efendi b. İbrahim ve Mehmed Efendi b. Ahmed nâm kimesneler şehâdetleriyle nehc-i şer‘î sâbit olan Ali Efendi b. Hüseyin mahzarında üzerine da‘vâ ve takrîr-i kelâm edip mûmâ-ileyh defterdâr efendinin etbâ‘ından olup bundan akdem Hisarcık ma‘rekesinde şehîden vefât eden Hüseyin Ağa’nın babası diğer Hasan benimle li-ebeveyn karındaşlar olup babamın ismi mezbûr Hasan ve dedemiz ismi Abdullah ve analarımız ismi (°) nâm hatun ve maskat-ı re’slerimiz vilâyet-i Rumeli’nde Opar kazâsına tâbi‘ Varvara nâm karye olup şehîd-i mezbûr Hüseyin’in verâseti benimle karye-i mezbûrede sâkine vâlidesi Zeliha bt. İbrahim b. Abdullah’a münhasıra olup bizden gayrı vâris ve terekesine müstahıkk-ı âhar olmamağla şehîd-i mezbûrun terekesinden müvekkilân-ı mezbûrân Osman Ağa ve Mehmed Ağa’nın bi-gayr-ı hakkın vaz‘-ı yed eyledikleri ber-mantûk-ı defter-i müfredât eşyâ-i ma‘lûme ve emti‘a-ı mütenevvi‘a ile memlû ve mukaffel sandıkdan bana isâbet eden sülüsân hissemi bi’l-verâse ve vâlidesi mezbûre Zeliha Hatun’a isâbet eden sülüs hisseyi dahi mezbûre Zeliha Hatun tarafından vekâletimi nâtıka işbu yedimdeki hüccet-i şer‘iyye mûcebince bi’l-vekâle taleb ederim vekîl-i mezbûrdan suâl olunup müvekkilân-ı mezbûrândan alıverilmesi matlûbumdur dedikde gıbbe’s-suâl vekîl-i mezbûr cevâbında fi’l-hakīka müvekkilân-ı mezbûrân Osman Ağa ve Mehmed Ağa şehîd-i mezbûrun zikr olunan eşyâ ve sandığına vaz‘-ı yedlerini ikrâr ancak müdde‘î-i mezbûr ve müvekkilesinin verâsetlerini mazmûn-ı sıhhat-vekâletini inkâr etmeğin müdde‘î-i mezbûr Mehmed Beşe’den müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden ve zikr olunan Opar kazâsı ahâlîsinden olup mahmiye-i mezbûrede sâlifü’z-zikr kasablar kârhânesinde sâkinân Mehmed Beşe b. Ahmed ve Abdi Beşe b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr Mehmed Beşe şehîd-i mezbûr Hüseyin Ağa’nın babası Hasan ile li-ebeveyn karındaşlar olup babaları ismi Hasan ve dedeleri ismi Abdullah ve anaları ismi (°) nâm hatun ve maskat-ı re’sleri vilâyet-i Rumeli’nde Opar kazâsına tâbi‘ Varvara nâm karye olup şehîd-i mezbûrun verâseti min-ciheti’l-usûbeti’n-nesebiye müdde‘î-i mezbûr Mehmed Beşe ile zikr olunan Varvara karyesinde sâkine anası Zeliha bt. İbrahim b. Abdullah’a münhasıra olup bunlardan gayrı vârisi ve terekesine müstahıkk-ı âharı olduğu ma‘lûmumuz değildir ve mezbûre Zeliha Hatun oğlu şehîd-i mezbûrun terekesinden kendiye isâbet eden hisessini terekesine vâzı‘u’l-yed olanlardan taleb ve da‘vâ ve ahz u kabz ve kendüye îsâle müdde‘î-i mezbûr Mehmed Beşe’yi bizim huzûrumuzda yedindeki işbu mukırra olan hüccet mantûku üzere tarafından vekîl ve nâib-i menâb nasb u ta‘yîn edip ol dahi kabûl eyledi, bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh müdde‘î-i mezbûr Ali Efendi mahzarında bi’l-asâle ve’l-vekâle ikrâr ve i‘tirâf edip ânifen bana redd ü teslîmine tenbîh olunan ber-mantûk-ı defter-i müfredât eşyâ-i ma‘lûme ve emti‘a-i mütenevvi‘a ile memlû ve mukaffel sandığı müvekkilân-ı mezbûrân yedlerinden bi’l-asâle ve’l-vekâle ahz u kabz edip müvekkilân-ı mezbûrân zimmetlerinde mûrisimiz şehîd-i mezbûrun terekesinden bir nesne kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: Hacı Mustafa b. Hacı Mehmed, es-Seyyid Mustafa Çelebi b. Hasan Edirneli, Mehmed Ağa b. Abdullah tahtacı, Ömer Efendi b. Nurullah Efendi, fahrü’l-kuzât es-Seyyid Ömer Efendi b. es-Seyyid Halil, fahrü’l-müderrisîni’l-kirâm es-Seyyid Mehmed Ma‘sum Efendi La‘lîzâde, Mustafa Çelebi b. el-Hâc Mehmed, Kayıkcı Mustafa Çelebi, Ali b. Abdullah