Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 295 Hüküm no: 285 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ebubekir Efendi’nin varislerinin vekilleri Molla İsa vasıtasıyla terekeden haklarını aldıkları İsbât-ı vekâlet Vilâyet-i Rumeli’de eyâlet-i Bosna’da Hersek sancağında medîne-i Foça mahallâtından Cafer Bey mahallesi ahâlîsinden olup Mekke-i mükerremede müsâfiren sâkin iken bundan akdem vefât eden el-Hâc Ebubekir b. Mustafa b. Abdullah’ın verâseti medîne-i mezbûrede sâkinler li-ebeveyn er karındaşları Salih ve Ali nâm kimesnelere münhasıra olduğu şer‘an zâhir ve mütehakkık oldukdan sonra mezbûrân Salih ve Ali taraflarından ber-mûceb-i hüccet iddi‘â-i vekâlet eden bâ‘is-i hâze’l-kitâb Molla İsa b. eş-Şeyh Ebubekir Efendi nâm kimesne meclis-i şer‘-i şerîf-i enverde müteveffâ-yı mezbûrun bâ-hüccet-i şer‘iyye vasiyy-i muhtârı olup terekesine bi’l-vesâye vâzı‘u’l-yed olan el-Hâc Mehmed b. İbrahim nâm kimesne muvâcehesinde ve Salih Beşe b. Mustafa b. Abdullah’ın li-ebeveyn karındaşı ve zikri câî husûsa tarafından vekîl-i şer‘îsi el-Hâc Ali nâm kimesne hâzır olduğu halde üzerlerine da‘vâ ve takrîr-i kelâm edip mezbûr el-Hâc Mehmed müteveffâ-yı mezbûr el-Hâc Bekir’in hîn-i vefâtında yanında mevcûd bulunan nakid on yedi bin iki yüz kırk akçesini bi’l-vesâye ahz u kabz etmekle mezbûrân Salih ve Ali meblağ-ı mezbûru ve müvekkil-i mezbûr Salih Beşe’nin yedinde bi-tarîkı’l-emâne memhûr defter-i müfredât mantûkunca eşyâ-i ma‘lûmesini mezbûrân el-Hâc Mehmed ve Salih Beşe’den taleb ve da‘vâ ahz u kabza ve lede’l-iktizâ sulh ve ibrâya ve kendülere îsâl ve teslîme ve bunlar mutavakkıf olduğu umûrun küllîsine taraflarından beni vekîl ve nâib-i menâb nasb u ta‘yîn eylediklerinde ben dahi ber-vech-i muharrer vekâlet-i mezbûreyi kabûl ve merâsimini mahallinde edâya ta‘ahhüd eylediğim ecilden meblağ-ı mezbûr on yedi bin iki yüz kırk akçeyi mezbûr el-Hâc Mehmed’den ve eşyâ-i ma‘lûmeyi müvekkili mezbûr Salih Beşe’den bi’l-vekâle taleb ederim suâl olunup bana teslîme tenbîh olunması murâdımdır dedikde gıbbe’s-suâl mezbûr el-Hâc Mehmed ve vekîl-i mezbûr el-Hâc Ali cevâblarında müteveffâ-yı mezbûrun bi’l-vesâye on yedi bin iki yüz kırk akçesini kabz eylediğini ve ber-mûceb-i defter-i müfredât eşyâ-i ma‘lûmesini bi-tarîkı’l-emâne yedinde olduğunu bi’l-vekâle ikrâr lâkin ber-vech-i muharrer vekâletini ma‘lûmumuz değildir deyü inkâr edicek mezbûr Molla İsa’dan ber-vech-i meşrûh müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden ve zikr olunan Foça ahâlîsinden olup mahmiye-i İstanbul’da Kilidhanı’nda müsâfiren sâkinler Hasan Bey b. el-Hâc Fazlullah ve Molla Abdullah b. Ahmed Efendi nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka Cafer Bey mahallesi ahâlîsinden olup Mekke-i mükerremede müsâfiren sâkin iken bundan akdem vefât eden el-Hâc Ebubekir Efendi b. Mustafa b. Abdullah’ın li-ebeveyn er karındaşları olup zikr olunan Foça sâkinlerinden Salih ve Ali nâm kimesneler müteveffâ-yı mezbûr el-Hâc Ebubekir’in bâ-hüccet-i şer‘iyye vasiyy-i muhtârı olan el-Hâc Mehmed müteveffâ-yı mezbûrun hîn-i vefâtında yanında mevcûd bulunan nakid on yedi bin iki yüz kırk akçesini ve müvekkil-i mezbûr Salih Beşe b. Mustafa b. Abdullah’ın yedinde bi-tarîkı’l-emâne memhûr defter-i müfredât mantûkunca eşyâ-i ma‘lûmesini mezbûrân el-Hâc Mehmed ve Salih Beşe’den taleb ve da‘vâ ve ahz u kabza ve lede’l-iktizâ sulh ve ibrâya ve kendülere îsâl ve teslîme ve bunlar mutavakkıf olduğu umûrun küllîsine mezbûrân Salih ve Ali taraflarından bizim huzûrumuzda mezbûr Molla İsa’yı vekîl ve nâib-i menâb nasb u ta‘yîn eylediklerinde merkūm Molla İsa dahi ber-vech-i muharrer vekâlet-i mezbûreyi kabûl ve merâsimini mahallinde edâya ta‘ahhüd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh merkūm Molla İsa meclis-i şer‘-i hatîr-ı lâzımü’t-tevkīrde mezbûr el-Hâc Mehmed ile merkūm Salih Beşe’nin vekîli mezbûr el-Hâc Ali mahzarlarında bi’l-vekâle ikrâr-ı tâm ve takrîr-i kelâm edip ânifen edâsına tenbîh olunan meblağ-ı mezbûr on yedi bin iki yüz kırk akçeden vasiyy-i merkūm yediyle ba‘de ihrâci’l-mesârif on üç bin kırk akçeyi merkūm el-Hâc Mehmed yedinden ve ber-mûceb-i defter-i müfredât eşyâ-i ma‘lûmeyi vekîl-i mezbûr el-Hâc Ali yedinden bi’l-vekâle tamâmen ahz u kabz eyledim ba‘de’l-yevm tereke-i müteveffâ-yı mezbûra müte‘allıka âmme-i da‘vâdan mezbûrân el-Hâc Mehmed ve Salih Beşe’nin zimmetlerini bi’l-vekâle ibrâ-i âmm-ı vâkı‘u’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 S sene 1153. Şuhûdü’l-hâl: el-Hâc Ahmed Efendi, Kethüdâ el-Hâc Mustafa Efendi, fahrü’l-müderrisîni’l-kirâm Mukīmzâde Mehmed Efendi, fahrü’l-müderrisîni’l-kirâm merhûm Şeyhzâde Abdurrahim Efendi, Mehmed Çelebi b. Abdullah, el-Hâc Mustafa b. Hacı Mehmed, el-Hâc Ali b. Mustafa, el-Hâc Hüseyin, el-Hâc Ahmed Ağa, el-Hâc Mustafa b. Mahmud