Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 297 Hüküm no: 286 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kobitse’ye borcu olan Tanaş’ın parayı vekili olan Bakkal Dimo’ya ödediği Vilâyet-i Rumeli’nde İzdin kazâsına tâbi‘ Kabeşi nâm karyede mütemekkine Kobitse bt. Yorgi v. Nikola Nasrâniye tarafından ber-vech-i âtî vekâlet iddi‘â eden hâmilü’r-rakīm Bakkāl Dimo v. Yani nâm zimmî meclis-i şer‘-i hatîr-ı lâzımü’t-tevkīrde Tanaş v. Dimo nâm zimmî muvâcehesinde üzerine da‘vâ ve takrîr-i kelâm edip mesfûre Kobitse bt. Yorgi v. Nikola merkūm Tanaş zimmetinde cihet-i karzdan olan on guruşunu merkūm Tanaş’dan taleb ve da‘vâ ve ahz u kabza ve Rüstem Paşa Vakfı musakkafâtından mahmiye-i İstanbul’da Küçük Mustafa Paşa mahallesinde vâki‘ lede’l-ahâlî ma‘lûmü’l-hudûd bir bâb Attâr dükkânında olan sülüs hissesini bedel-i misli ve ma‘rifet-i mütevellî-yi vakf ile âhara ferâğa ve kabz-ı bedele ve kendüye îsâle ve teslîme ve bunlar mutavakkıf olduğu umûrun küllîsine tarafından beni vekîl ve nâib-i menâb nasb u ta‘yîn ettikde ben dahi ber-vech-i muharrer vekâlet-i merkūmeyi kabûl ve hıdemât-ı lâzımesini mahallinde edâya ta‘ahhüd ve iltizâm eylediğim ecilden meblağ-ı mezbûr on guruşu merkūm Tamaş’dan taleb eylediğim[de] edâdan imtinâ‘ eder, suâl olunup bana edâya tenbîh olunmak bi’l-vekâle murâdımdır dedikde gıbbe’s-suâl merkūm Tanaş cevâbında müvekkile-i mesfûreye cihet-i merkūmeden zimmetinde on guruş deyni olduğunu ikrâr lâkin müdde‘î-i mezbûrun vekâletini inkâr edicek müdde‘î-i mezbûr Dimo’dan ber-vech-i meşrûh vekâletine beyyine taleb olundukda udûl-ı millet-i Nasârâdan ve karye-i merkūme ahâlîsinden olup mahmiye-i mezbûrede ticâret vechi üzere mütemekkinler Tanaş v. Nikola ve Dimitri v. Nikola nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ vilâyet-i Rumeli’de İzdin kazâsına tâbi‘ Kabeşi nâm karyede mütemekkine Kobitse bt. Yorgi v. Nikola işbu Tanaş zimmetinde cihet-i karzdan olan on guruşunu merkūm Tanaş’dan taleb ve da‘vâ ve ahz u kabza ve Rüstem Paşa Vakfı musakkafâtından mahmiye-i İstanbul’da Küçük Mustafa Paşa mahallesinde vâki‘ lede’l-ahâlî ma‘lûmü’l-hudûd bir bâb attâr dükkânında olan sülüs hissesini bedel-i misli ve ma‘rifet-i mütevellî-yi vakf ile âhara ferâğa ve ahz u kabz-ı bedele ve kendüye îsâl ve teslîme ve bunlar mütevakkıf olduğu umûrun küllîsine tarafından müdde‘î-i mezbûr Dimo’yu bizim huzûrumuzda vekîl ve nâib-i menâb nasb u ta‘yîn ettikde ol dahi ber-vech-i muharrer vekâlet-i merkūmeyi kabûl [42a] ve hıdemât-ı lâzımesini mahallinde edâya ta‘ahhüd ve iltizâm ve bizi işhâd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm ve’t-tenbîh mezbûr Dimo meclis-i şer‘de merkūm Tanaş muvâcehesinde bi’l-vekâle ikrâr ve takrîr-i kelâm edip merkūm Tanaş ânifen edâsına tenbîh olunan on guruşu bana def‘ ü teslîm etttikde ben dahi vekâlet-i mahkiyem hasebiyle yedinden tamâmen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 S sene 1153. Şuhûdü’l-hâl: Eyyûbî Mehmed b. Mustafa, Hüseyin Çelebi b. el-Hâc Mehmed, es-Seyyid Ali b. Mustafa, el-Hâc Ahmed b. Ömer, Ahmed Çelebi b. Şa‘bân, el-Hâc Mustafa b. el-Hâc Ahmed, es-Seyyid Mustafa Çelebi b. es-Seyyid Hasan