Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 298 Hüküm no: 287 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miskçi Mehmed’in İbrahim b. Abdullah’daki alacığını tahsil ettiği Mahrûse-i Galata’ya muzâfe kasaba-i Kasımpaşa’da Tahtaköprü mahallesinde sâkin bâ‘is-i hâzihi’l-vesîka Miskçi Mehmed b. Ali nâm kimesne meclis-i şer‘-i şerîf-i enverde İbrahim b. Abdullah nâm kimesne mahzarında ikrâr-ı tâm ve takrîr-i kelâm edip mezbûr İbrahim’in zimmetinde cihet-i karzdan hakkım olup ikrârıyla şer‘an sâbit ve mahkûmun-bih olan seksen üç guruşdan mâ‘adâ beynimizde hukūk-ı şer‘iyyeye müte‘allıka mu‘âmelât-ı şettâ vâkı‘a olmağla meblağ-ı mezbûrdan mâ‘adâ bi-tarîkı’s-sulh yirmi yedi guruş ki cem‘an yüz on guruşu mezbûr İbrahim bana teslîm eyledikden sonra husûs-ı mezbûra ve işbu târîh-i vesîkaya gelince cemî‘ mu‘âmelât-ı şettâdan hukūk-ı ma‘lûme ve mechûleye müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûr İbrahim’in zimmetini ibrâ-i âm ile ibrâ ve ıskāt eyledim dedikde ol dahi merkūm Mehmed’i kelimât-ı meşrûhasında tasdîk ve kezâlik âmme-i da‘vâdan merkūm Mehmed’in vâlidesi hâzıra bi’l-meclis Zeyneb bt. Abdullah nâm hatunun zimmetlerini ibrâ-i âm ile [ibrâ] ve ıskāt etmeğin mâ-vaka‘a bi’t-taleb ketb olundu. Fî 19 S sene 1153. Şuhûdü’l-hâl: Süleyman b. Ahmed, Mehmed Çavuş b. Ahmed, Mübâşir Mehmed Çavuş b. Mehmed, İvaz b. Abdullah, Kasımpaşalı es-Seyyid Ebubekir b. es-Seyyid Ali, es-Seyyid el-Hâc Kasım Kapudan b. es-Seyyid el-Hâc İbrahim, Muhzır Süleyman Çelebi, Urfalı es-Seyyid Mustafa b. es-Seyyid Kasım, Mehmed b. Süleyman