Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 299 Hüküm no: 288 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide Hatun’un ev arsasını Hatice Hatun’a sattığı Mahmiye-i İstanbul’da Tekfur Sarayı kurbünde Çakırağa mahallesinde sâkine Hamide bt. Mehmed b. Receb nâm hatunun sadrî kebîr oğlu tarafından bey‘-i âti’z-zikre vekîl olduğu zâtını ârifân Musa b. Mehmed ve İsmail b. Aydın nâm kimesneler şehâdetleriyle ber-nehc-i şer‘î sâbit olan Ali b. Mehmed nâm kimesne meclis-i şer‘-i şerîf-i enverde bâ‘isetü hâzihi’l-vesîka Emetullah bt. Mustafa b. Abdullah nâm hatunun li-ebeveyn er karındaşı ve tarafından tasdîka vekîl-i sâbitü’l-vekâlesi el-Hâc Hasan nâm kimesne muvâcehesinde bi’l-vekâle ikrâr-ı tâm ve takrîr-i kelâm edip zikri câî akdin sudûruna değin müvekkilem mezbûrenin yedinde mülk ve hakkı olup mahalle-i merkūmede vâki‘ bir tarafdan Destereci Mehmed mülkü ve bir tarafdan Çıkrıkcı Süleyman mülkü ve bir tarafdan Musa Beşe mülkü ve bir tarafdan tarîk-i âm ile mahdûd tahmîmen altmış zirâ‘ mülk menzil arsasını enkāz-ı mevcûdesiyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi’l-vekâle merkūme Emetullah Hatun’a yirmi dört guruş üç rub‘ guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve kabz ve tesellüm ve kabûl eylediğinden sonra semen-i mebî‘-i mezkûr yirmi dört guruş üç rub‘ guruşu bi’l-vekâle müvekkile-i müşteriye-i merkūme Emetullah Hatun yedinden ahz u kabz eyledim fîmâ-ba‘d arsa-i mahdûde-i mezkûrede müvekkilem mezbûre Hamide’nin kat‘an alâka ve medhali kalmayıp müvekkile-i merkūme Emetullah Hatun’un mülk-i müşterâsıdır keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 S sene 1153. Şuhûdü’l-hâl: Mustafa Çelebi b. Mehmed, Mehmed Çelebi b. İbrahim, es-Seyyid Mustafa Beşe b. es-Seyyid Hasan, el-Hâc Mustafa b. el-Hâc Mehmed