Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 300 Hüküm no: 290 Orijinal metin no: [42a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gül bt. Haçador’un bazı eşyalarını kızı Gonca’ya sattığı Mahmiye-i İstanbul’da Kâtibkasım mahallesi mütemekkinelerinden olup şahsı zeyl-i rakīmde isimleri mastûr kimesneler ta‘rîfleriyle mu‘arrefe olan Gül bt. Haçador nâm Nasrâniye meclis-i şer‘-i hatîr-ı lâzımü’t-tevkīrde sadriye kebîre kızı olup şahsı kezâlik mu‘arrifân-ı mezbûrân ta‘rîfleriyle mu‘arrefe olan bâ‘isetü hâzihi’r-rakīm Gonca bt. Karabet nâm Nasrâniye mahzarında ikrâr-ı tâm ve takrîr-i kelâm edip eşyâ-i memlûkemden on miskāl bir çift altın bilezik ve beş miskāl bir altın gerdanlık ve iki incili kuşak ve bir çift zümrüd küpe ve bir beledî döşek ve bir yorgan ve iki yasdık ve beş vakıyye evân-ı nühâsiyeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin kızım mesfûre Gonca Nasrâniyeye yüz yirmi guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz yirmi guruş mutâlebesinden kızım mesfûre Gonca Nasrâniye’nin zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim ba‘de’l-yevm eşyâ-i muharrere-i mezkûrede kat‘an benim alâka ve medhalim kalmayıp kızım mezbûre Gonca Nasrâniyenin mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 S sene 1153. Şuhûdü’l-hâl: Du‘âcı Molla Hüseyin b. Hacı Mehmed, Mehmed Çelebi b. İbrahim, el-Hâc Mustafa b. Hacı Mehmed, Papa Abraham v. Nikifos, Bağdasar v. Zakar, Elmas v. Zakar, Ohannes v. Bağdasar