Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 301 Hüküm no: 291 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kenan adlı kölenin İsmihan Hanım’a ait olduğuna şahitlik edenler şehadet için kasabaya gelemediklerinden şahitliklerini başkalarına tahmil ettikleri Tahmîlü’ş-şehâde Zikri câî husûsa şâhidînü’l-asl olup mahmiye-i İstanbul’da Camcı Ali mahallesinde sâkin el-Hâc Ahmed Efendi b. İbrahim b. Abdurrahman ve Çıkrıkcı Kemâleddin mahallesinde sâkin es-Seyyid Mehmed Çelebi b. Hüseyin b. Ahmed nâm kimesneler meclis-i şer‘-i hatîr-ı lâzımü’t-tevkīrde bâ‘isey-i hâzihi’l-vesîka Ahmed Ağa b. el-Hâc Salih ve İsmail Beşe b. Şa‘bân ve Ahmed Beşe b. Hüseyin ve diğer Ahmed b. Mehmed nâm kimesneler mahzarında her biri takrîr-i kelâm edip işbu hâzır bi’l-meclis el-Hâc Süleyman Ağa b. Mustafa bundan akdem zevcesi İsmihan Hanım bt. Ahmed Ağa b. Abdullah tarafından vekâleti sâbit olduğu halde Ahî Çelebi Mahkemesi’nde hilâfeti müvellâ olan es-Seyyid Mehmed Hilmi Efendi huzûrunda vilâyet-i Rumeli’nde Yenipazar kazâsına tâbi‘ Gögefce? nâm karyeye firâr edip hâlâ karye-i mezbûrda sâkin orta boylu, çatık kaşlı, elâ gözlü, Gürciyyü’l-asl Kenan nâm gulâm Kullukçu Ebubekir Beşe yedinde iken müvekkilesi merkūme İsmihan Hanım’ın abd-ı memlûkü olduğunu mezbûr Ebubekir Beşe’den bi’l-istihkāk da‘vâ ve müdde‘âsını vech-i şer‘î üzere bizim şehâdetlerimiz ile isbât ettikden sonra ba‘de’t-tahlîfi’ş-şer‘î hâkim-i mûmâ-ileyhin hükmü lâhık olmuş idi, biz bu husûsa bu vech üzere şâhidleriz, lâkin edâ-i şehâdet için kasaba-i mezbûreye varıp şehâdet-i şer‘iyye etmek bizlere müte‘assir olmağla mezbûrûndan her biri mahallinde vech-i muharrer üzere lisânımızdan şehâdetimiz üzere edâ-i şehâdet-i şer‘iyye etmek üzere şehâdetimizi merkūmûna tahmîl eylediğimizde onlar dahi tahammül ve kabûl ve mahallinde vech-i muharrer üzere lisânımızdan şehâdetimiz üzere edâ-i şehâdet-i şer‘iyye etmek üzere şehâdetimizi merkūmûna tahmîl eylediğimizde onlar dahi tahammül ve kabûl ve mahallinde vech-i muharrer üzere edâ-i şehâdet-i şer‘iyye etmeğe ta‘ahhüd ve iltizâm eylediler dediklerinde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 20 S sene 1153. Şuhûdü’l-hâl: es-Seyyid Mustafa b. es-Seyyid Hasan, el-Hâc Mustafa b. el-Hâc Mehmed, Mehmed Çelebi b. Abdullah.