Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 302 Hüküm no: 292 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un vefatından sonra vasiyetini yerine getirmek üzere kocası Süleyman Çelebi’yi vasi tayin ettiği Mahmiye-i İstanbul’da Muhsine Hatun mahallesi sâkinelerinden olup zâtı Ali Çelebi b. el-Hâc Ahmed ve İbrahim b. el-Hâc Mehmed nâm kimesneler ta‘rîfleriyle mu‘arrefe olan Zeyneb bt. Abdullah b. Abdurrahman nâm hatun meclis-i şer‘-i şerîf-i enverde zevci bâ‘is-i hâze’l-kitâb Süleyman Çelebi b. Abdullah nâm kimesne mahzarında ikrâr-ı tâm ve takrîr-i kelâm edip ben bi-emrillâhi te‘âlâ vefât eylediğimde mezbûr Süleyman Çelebi vasiyy-i muhtârım olup cemî‘ terekemi bi’l-vesâye ahz u kabz edip sülüsünü ifrâz ve sülüs-i mezkûrdan iki bin dört yüz akçe ıskāt-ı salâtım için vech-i şer‘î üzere fukarâya devr ve tasadduk eyleye ve eyyâm-ı mu‘tâdede it‘âm-ı fukarâ eyleye ve sülüs-i mezkûrdan her ne bâkī kalırsa dilediği vücûh-ı birre harc ü sarf eyleye ve sülüsân terekemden zevcim mezbûr Süleyman Çelebi irsen nısf hissesini ahz u kabz edip ve nısf-ı âharını dahi zâhirde vâris-i ma‘rûf ve ma‘rûfem olmayıp benim için vasiyet bimâ zâde ale’s-sülüs câize olmağın bi-hükmi’l-vasiye zevcim mezbûr Süleyman Çelebi ahz u kabz eyleye deyü vasiyet ve tenfîzine zevcim merkūm Süleyman Çelebi’yi vasiyy-i muhtâr nasb u ta‘yîn eyledim dedikde merkūm Süleyman Çelebi dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ yenbağī mahallinde edâya ta‘ahhüd ve iltizâm eyledim dedikde mâ hüve’l-vâki‘ bi’t-taleb ketb olundu. Fî 20 S sene 1153. Şuhûdü’l-hâl: es-Seyyid el-Hâc İsmail Çelebi b. İbrahim, Mustafa Çelebi b. el-Hâc Mehmed, Hüseyin Çelebi b. Abdullah, İbrahim Çelebi b. el-Hâc Mehmed, Ali Çelebi b. el-Hâc Ahmed, Müezzin el-Hâc Hasan b. İbrahim, el-Hâc Nasrullah b. Abdullah, Mehmed Çelebi b. Abdullah, Mustafa b. Abdullah, Mustafa Beşe b. Halil, Halil Çelebi b. Abdullah