Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 302 Hüküm no: 293 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin vefatından sonra vasiyetini yerine getirmek üzere hanımı Zeyneb Hatun’u vasi tayin ettiği Mahmiye-i İstanbul’da Muhsine Hatun mahallesi ahâlîsinden Süleyman Çelebi b. Abdullah b. Abdülmennan nâm kimesne meclis-i şer‘-i hatîr-ı lâzımü’t-tevkīrde zevcesi olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Zeyneb bt. Abdullah nâm hatun mahzarında ikrâr ve takrîr-i kelâm edip ben bi-emrillâhi te‘âlâ vefât eylediğimde zevcem mezbûre Zeyneb Hatun vasiyy-i muhtârım olup cemî‘ terekemi bi’l-vesâye ahz u kabz edip sülüsünü ifrâz ve sülüs-i mezkûrdan bin bir akçe ıskāt-ı salâtım için vech-i şer‘î üzere fukarâya devr ve tasadduk eyleye ve eyyâm-ı mu‘tâdede it‘âm-ı fukarâ eyleye ve sülüs-i mezkûreden her ne bâkī kalırsa dilediği vücûh-ı birre harc ü sarf edip eyleye ve sülüsân terekemden zevcem mezbûre Zeyneb Hatun irsen rub‘ hissesini ahz u kabz edip selâse-i erbâ‘ını dahi zâhirde vâris-i ma‘rûf ve ma‘rûfem olmayıp benim için bimâ zâde ale’s-sülüs câiz olmağın bi-hükmi’l-vasiye zevcem mezbûre Zeyneb Hatun ahz u kabz eyleye deyü vasiyet ve tenfîzine zevcem mezbûre Zeyneb Hatun’u vasiyy-i muhtâr nasb u ta‘yîn eyledim dedikde mezbûre Zeyneb Hatun dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ yenbağī mahallinde edâya ta‘ahhüd ve iltizâm eyledim dedikde mâ hüve’l-vâki‘ bi’t-taleb ketb olundu. Fî 21 S sene 1153. Eş-şâhîdûnü’s-sâbikūn