Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 303 Hüküm no: 294 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın çocuklarına nafaka takdiri Mahmiye-i İstanbul hısnı ebvâbından Topkapısı dâhilinde Fâtıma Sultan mahallesinde sâkin iken bundan akdem düyûnu terekesinden ezyed olduğu halde vefât eden sâbıkā Hamalbaşı es-Seyyid Mahmud b. es-Seyyid Hasan’ın sulbî sagīr oğulları Seyyid Ahmed ve Seyyid Ali ve Seyyid İbrahim’in hâdine ve vâlideleri zâtı ta‘rîf-i şer‘î ile mu‘arrefe olan işbu râfi‘ati’l-kitâb Hadîce bt. Abdullah nâm hatun meclis-i şer‘-i hatîr-ı lâzımü’t-tevkīrde sıgār-ı mezkûrûnun li-eb er karındaşları olup mahmiye-i mezbûrede Unkapanı İskelesi’nde hamalbaşı olan es-Seyyid Yahya Çelebi b. el-mezbûr es-Seyyid Mahmud mahzarında takrîr-i kelâm ve ta‘bîr ani’l-merâm edip müteveffâ-yı mezbûr es-Seyyid Mahmud’un firâşından hâsılûn ve benden mütevellidûn olup hâlâ bi-hakkı’l-hıdâne hacr ve terbiyemde olan sıgār-ı mezkûrûnun nafaka ve kisveye eşedd-i ihtiyâcları olup ism-i mâl ıtlâk olunur bir nesneleri olmayıp ve ben dahi mu‘dime ve mu‘sire olup sıgār-ı mezkûrûnu infâk ve iksâya kudretim olmamağın işbu Hamalbaşı es-Seyyid Yahya sıgār-ı mezkûrûnun li-eb karındaşları olup melî ve mûsir olmağla sıgār-ı mezkûrûnun nafaka ve kisveleri’çün mezbûr es-Seyyid Yahya üzerine kıbel-i şer‘-i enverden kadr-ı ma‘rûf nafaka ve kisve-bahâ farz ve takdîr olunması bi’l-hıdâne matlûbumdur dedikde fi’l-vâki‘ kazıyye vech-i muharrer üzere olduğu zeyl-i vesîkada isimleri Müslimîn ihbârlarıyla lede’ş-şer‘i’l-enver mütehakkık olmağın hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ-lehû ve hüsnü-meâb efendi hazretleri sıgār-ı mezbûrûnun nafaka ve kisveleri’çün karındaşları mezbûr es-Seyyid Yahya üzerine târîh-i kitâbdan her biri için yevmî dörder akçeden cem‘an on iki akçe nafaka ve kisve-bahâ farz ve takdîr edip ve meblağ-ı mefrûz-ı mezkûru sıgār-ı mezkûrûnun nafaka ve kisvelerine harc ü sarfa ve lede’l-iktizâ istidâneye ve inde’z-zafer karındaşları mezbûr üzerine rücû‘a hâdine-i mezbûre Hadîce Hatun’a izin vermeğin mâ hüve’l-vâki‘ bi’t-taleb ketb olundu. Fî 21 S sene 1153. Şuhûdü’l-hâl: Ali b. Abdullah, Mustafa b. Mehmed, el-Hâc Mustafa b. el-Hâc Mehmed, fahrü’l-müderrisîni’l-kirâm es-Seyyid Mehmed Tahir Efendi b. el-merhûm Mahmud Efendi, fahrü’l-akrân Ahmed Ağa kethüdâ-yı hazret-i Kadı Efendi, es-Seyyid Halil Efendi b. es-Seyyid Hüseyin el-imâm