Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 324 Hüküm no: 469 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdurrahman’ın borcu olduğu Mahrûse-i Kostantıniyye Uzunçarşı’da vâki‘ Vezirhanı demekle ma‘rûf handa sâkin işbu bâ‘isü’r-rakīm Halil Beşe b. el-Hâc Mehmed nâm kimesne meclis-i hatîr-i lâzımü’t-tevkīrde Galata’da Arab Câmi‘i Mahallesi’nde sâkin Ali b. Abdurrahman nâm kimesne mahzarında üzerine da‘vâ ve takrîr-i kelâm edip mezbûr Ali’nin zimmetinde cihet-i deyn-i şer‘iyyeden iki bin altı yüz yetmiş beş akçe hakkım vardır, suâl olunup alıverilmesi matlûbumdur [70a] dedikde gıbbe’s-suâl mezbûr Ali cevâbında fi’l-vâki‘ müdde‘î-i mezbû[r] Halil Beşe’ye meblağ-ı mârru’z--zikr iki bin altı yüz yetmiş beş akçe el-ân zimmetimde vâcibü’l-edâ ve lâzımü’l-kazâ deynim vardır deyü bi-tav‘ihi ikrâr u i‘tirâf etmeğin mûcebince meblağ-ı mesfûru müdde‘î-i mezbûra edâ ve teslîm etmek üzere merkūm Ali ilzâm olunup mâ-vaka‘a gıbbe’t-taleb ketb olundu. Fi’l-yevmi’l-hâdî ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Nasuh Halîfe b. Mustafa, Pîrî Beşe b. Hüseyin, İbrahim Çelebi b. Davud, Mehmed Muhyi b. Hüseyin.