Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 304 Hüküm no: 295 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un kocası Molla Ahmed’e mehrinin bir kısmını hibe edip bir kısım eşyasını da sattığı Mahmiye-i İstanbul’da Mimârayas mahallesinde sâkine Hadîce bt. Ali b. Abdullah nâm hatun tarafından husûs-ı âti’l-beyânda ikrâra vekîl olduğunu zâtını ârifân mahalle-i mezbûre imâmı Osman Efendi b. Halil ve Osman Çelebi b. Abdullah nâm kimesneler şehâdetleriyle sâbit olan Hasan Çelebi b. Musa nâm kimesne meclis-i şer‘-i hatîr-ı lâzımü’t-tevkīrde bâ‘isü’l-kitâb zevci Molla Ahmed b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûrem Hadîce Hatun işbu zevci Molla Ahmed zimmetinde mütekarrer ve ma‘kūdün-aleyh olan elli guruş mehr-i müeccelenin kırk guruşunu mezbûre Molla Ahmed’e hîbe ve temlîk ve eşyâ-i memlûkesinden on aded müsta‘mel çatma yasdık ve iki beledî yasdık ve bir orta keçesi ve üç yan keçesi ve üç minder ve bir çuka ocak yaşmağı ve bir seccâde ve dört döşek ve beş yemenî yorgan ve bir çift altın bilezik ve bir inci kuşak ve bir gümüş kuşak ve bir kapı perdesi ve bir incili küpe ve on iki sahan ve sekiz tencere ve dört tepsi ve bir tâbe ve üç tas ve bir sincab kürk ve beş anteri ve bir çuka ferâce ve bir güğüm ve bir maşrabasını dahi safka-i vâhide ile yüz elli guruşa mezbûr Molla Ahmed’e bey‘ ve temlîk ve teslîm ol dahi ber-vech-i muharrer meclis-i hîbede ittihâb ve iştirâ ve temellük ve tesellüm ve kabz ve kabûl eylediğinden sonra eşyâ-i mezbûrenin semeni olan meblağ-ı mezbûr yüz elli guruşdan müvekkile-i mezbûre Hadîce mezbûr Molla Ahmed’in zimmetini ibrâ-i âm ile ibrâ ve ıskāt edip ba‘de’l-yevm eşyâ-i muharrere-i mezbûre merkūm Molla Ahmed’in mülk-i müşterâsı ve meblağ-ı mezbûr kırk guruş dahi mülk-i mevhûbu olmuşdur fîmâ-ba‘d eşyâ-i mezkûrede ve meblağ-ı mezbûr kırk guruşda benim kat‘an alâkam kalmadı keyfe mâ yeşâ ve yehtâr mutasarrıf olsun dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 21 S sene 1153. Şuhûdü’l-hâl: Osman Çelebi b. Abdullah, Manav Ali Beşe b. Mustafa, Çakmakcı Hasan Beşe b. Hüseyin, el-Hâc Yusuf b. Abdullah el-attâr, Molla Mehmed b. Hüseyin el-müezzin