Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 304 Hüküm no: 296 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un evini Ahmed Çelebi’ye sattığı Mübâya‘a Mahmiye-i İstanbul’da Burmalı Mescid mahallesinde sâkine zâtı ta‘rîf-i şer‘î ile mu‘arrefe olan Saliha Hatun bt. Ahmed meclis-i şer‘-i hatîr-ı lâzımü’t-tevkīrde işbu râfi‘ü’l-kitâb Ahmed Çelebi b. Mustafa b. Abdullah tarafından ikrâr-ı akd-i âti’z-zikri tasdîka ber-nehc-i şer‘î vekâleti sâbit olan Mahmud Çelebi b. Mustafa nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahrûse-i Galata muzâfâtından İstinye nâhiyesine tâbi‘ Sarıyer nâm karyede vâki‘ iki tarafdan Mehmed Çelebi ve Ahmed Çelebi mülkleri ve bir tarafdan cebel ve bir tarafdan tarîk-i âm ile mahdûd fevkānî iki bâb oda ve bir sofa ve dehliz ve tahtânî bir bâb oda ve kenîf ve bi’r-i mâ ve bir mikdâr bahçeyi ve Pîrî Beşe nâm kimesne ile müşterek duvarı müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile müvekkil-i mezbûr Ahmed Çelebi’ye yüz elli guruşa bey‘ ve temlîk ve teslîm eylediğimde ol dahi ber-vech-i muharrer yedimden ba‘de’l-iştirâ ve’l-kabz ve’t-tesellüm ve’l-kabûl semeni olan meblağ-ı mezbûr yüz elli guruşu müşteri-yi mezbûr Ahmed Çelebi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr müşteri-yi mezbûr Ahmed Çelebi’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 21 S sene 1153. Şuhûdü’l-hâl: İbrahim b. Hasan, es-Seyyid Ahmed Çelebi b. es-Seyyid Ahmed, Abdullah b. Mustafa, Mehmed Çelebi b. Hasan, Mehmed Çelebi b. Hüseyin, Ahmed Çelebi b. Osman