Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 305 Hüküm no: 297 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hanım’ın evini Mehmed Ağa’ya sattığı Mübâya‘a Medîne-i Hazret-i Ebâ Eyyûb el-Ensârî -radiyallâhu anhü Rabbühü’l-bârî-de Otakçılar kurbünde Davud Ağa mahallesinde sâkine fahrü’l-muhadderât Fâtıma Hanım bt. el-merhûm Kadıasker Abdullah Efendi b. Nurullah tarafından husûs-ı âti’l-beyânda vekîl olduğu zât-ı mûmâ-ileyhâyı ma‘rifet-i şer‘iyye ile ârifân Ali Çelebi b. Ahmed ve diğer Ali Çelebi b. Mustafa nâm kimesneler şehâdetleriyle şer‘an sâbit olan fahrü’l-müderrisîni’l-kirâm Mehmed Arif Efendi b. el-merhûm Hüseyin Efendi meclis-i şer‘-i şerîf-i enverde Dergâh-ı âlî -dâme mahfûfen bi’l-me‘âlî- yeniçerilerinin üçüncü bölük çorbacılarından sâhib-i hâzihi’l-vesîka fahrü’l-emâsil ve’l-akrân Mehmed Ağa b. Mustafa mahzarında bi’l-vekâle ikrâr-ı tâm ve takrîr-i kelâm edip müvekkilem mûmâ-ileyhânın akd-i âti’z-zikrin sudûruna dek yedinde mülkü olup mahmiye-i İstanbul’da Atmeydanı kurbünde Suhte Sinan mahallesinde vâki‘ bir tarafdan ba‘zan Râbia Hanım ve ba‘zan Cündî Mehmed Ağa menzilleri ve bir tarafdan yine mezbûr Cündî Mehmed Ağa menzili ve bir tarafdan merhûm Sinan Çavuş Vakfı’ndan olup yine müşteri-yi mezbûra ferâgat olunan menzil ve bir tarafdan tarîk-i âm ile mahdûd hâriciyesinin tabaka-i ulyâsında iki bâb oda ve bir sofa ve vüstâsında bir oda ve bir kenîf ve süflâsında ahur ve dâhiliyesinin tabaka-i ulyâsında iki bâb oda ve bir sofa ve dehliz ve kenîf ve vüstâsında iki bâb oda ve bir kilâr ve kenîf ve süflâsından bir matbah ve mahtab ve taş musluk ve bi’r-i mâ ve cüneyneyi müştemil menzilini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin yedi yüz elli guruşa mezbûr Mehmed Ağa’ya bi’l-vekâle bey‘ ve teslîm eylediğimde ol dahi iştirâ ve tesellüm ve kabûl ve semeni olan meblağ-ı mezbûr bin yedi yüz elli guruşu bana teslîm eyledikde ben dahi yedinden bi’l-vekâle tamâmen tesellüm ve ahz u kabz edip bey‘-i mezkûrun tağrîr ve gabnine müte‘allıka âmme-i da‘vâdan merkūm Mehmed Ağa’nın zimmetini bi’l-vekâle ibrâ ve ıskāt eyledim ba‘de’l-yevm menzil-i mahdûd-ı mezkûr müşteri-yi mezbûr Mehmed Ağa’nın mülk-i müşterâsı ve hakk-ı sırfı olmuşdur, keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 S sene 1153. Şuhûdü’l-hâl: Çorbacı Mehmed Ağa Bektaşîzâde, Çorbacı Ahmed Ağa, es-Seyyid Ahmed b. es-Seyyid Mustafa, Halil Ağa b. el-Hâc Yusuf, Mehmed Efendi b. Ömer, Mustafa Efendi b. el-Hâc Mehmed, ve Çorbacı Mehmed Ağa