Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 306 Hüküm no: 298 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hasan’ın eşi Mehmed’den muhâlaa yoluyla boşandığı Mahmiye-i İstanbul’da Şehremîni kurbünde Ereğli mahallesinde sâkine ve zâtı ta‘rîf-i şer‘î ile mu‘arrefe olan Emine bt. Hasan nâm hatun meclis-i şer‘-i şerîf-i âlî-kadrde zevci râfi‘ü’l-kitâb Topal Mehmed b. Mustafa nâm kimesne muvâcehesinde ikrâr-ı tâm ve takrîr-i kelâm edip bundan akdem mezbûr Topal Mehmed ber-mantûk-ı defter-i müfredât mecmû‘u iki yüz guruş kıymetli eşyâmı âhara bey‘le istihlâk etmekle kıymetini mezbûrdan taleb ve da‘vâ ettiğimde ol dahi bi’l-külliye inkâr etmeğin beynimizde nizâ‘-ı küllî cereyân etmiş idi, el-hâletü hâzihi muslihûn tavassut edip da‘vâ-yı merkūmemden beni mezbûr Topal Mehmed ile an-inkâr otuz guruş üzerine inşâ-i akd-i sulh eylediklerinde ben dahi ber-vech-i muharrer sulh-ı merkūmu kabûl ve bedel-i sulh-ı merkūm otuz guruşu yedinden ba‘de’l-ahz ve’l-kabz mezbûr Topal Mehmed ile hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan bin iki yüz akçe mehr-i müeccelimi bana def‘ ü teslîm ben dahi yedinden kabz ve tesellüm eylediğimden sonra nafaka-i iddet-i mu‘ayyene-i ma‘lûmem ve me’ûnet-i süknâm üzerlerine mezbûr Topal Mehmed ile ber-nehc-i şer‘î hul‘ olduğumda ol dahi ber-minvâl-i muharrer hul‘-i mezbûru kabûl eyleyip hukūk-ı zevciyete ve târîh-i kitâba gelince sâir hukūka müte‘allıka âmme-i de‘âvî ve mutâlebât ve kâffe-i muhâsamât ve eymândan her birimiz âharın zimmetini ibrâ ve ıskāt eyledik dedikde gıbbe’t-tasdîk mâ-vaka‘a bi’t-taleb ketb olundu. Fî 21 S sene 1153. Şuhûdü’l-hâl: el-Hâc Mustafa Arabzâde, Mehmed Beşe b. Ahmed, Süleyman Çelebi b. Mehmed, İbrahim Çavuş b. Ömer, İskilibli Ömer Çavuş Ağa, es-Seyyid Mustafa Ruhalı, Eyyûbî Mehmed b. Mustafa, Mehmed Çelebi b. Ahmed, Ahmed Çelebi b. Şa‘bân, Mehmed Çelebi b. İbrahim